گاهدان دیلینی هئچ باشا دوشه بیلمه‌دیییم بیر فیلمه باخارام. بو ایشی لذت آپارماق اوچون گؤرمه‌رم –ذاتن بو ایشده، لذت دئیه بیر زادین اولا بیله‌جه‌یینه هئچ ده اینانا بیلمیرم. دوغال اولاراق، فیلمده‌کی دانیشیق‌لاری باشا دوشه بیلمه‌دیییمه گؤره، فیلمدن هئچ نه آلا بیلمه‌رم. هله، هردن کاراکتئرلرین اوجادان اوجادان دانیشیب، باغیریب حتی گولمه‌لری بو ایشی منیم اوچون چوخ اذیت وئریجی بیر سیناغا چئویرر.

بلکه ده “آزارین وار می؟” دئیه، بلکه ده “نوخوشموسان؟” دئیه، بلکه ده “مازوخیست‌می سن؟” دئیه، سورغولار سوروشماق ایسته‌یییرسینیز مندن! بلکه ده سیز حاقلی‌سینیز. آخی هانسی عاغیللی آدام، هانسی ساغلام بیچیملی بیر آدام بو ایشی گؤرر؟

بیلمیرم بو سورغونو مندن سوروشدوغونوزدا سیزین نئچه یاشینیز وار؟ گنج اولسانیز نه دئدیییمی، بلکه، اولدوغو کیمی دوشونه بیلمه‌یه‌جکسینیز. سیز نه بیلیرسینیز دیلینی باشا دوشه بیلمه‌دییینیز بیر فیلمه باخماغین زورندا قالماق نئجه اولار؟

بلکه ده “کیمسه سنی بو ایشه زورلاماییب‌دیر” دئیه، منی قیناماق ایسته‌یییرسینیز. آنجاق، دئدیییم کیمی سیز منی باشا دوشمکده زورلوق چکه‌جکسینیز. منیم سؤزلریمی منیم یاشیت‌لاریم باشا دوشه‌بیلرلر. آغ_قارا_تیلویزیون‌لاری خاطیرلایا بیلنلر باشا دوشه‌بیلرلر. او جنایتکار آغ-قارا تیلویزیونلاردان دانیشماق ایسته‌یییرم.

سؤزسوز، ایندی ده “تیلویزیون جنایتکار اولا بیلمز” دئیه، دوشونورسونوز. سیزی دوشونه بیلیرم. سیز جنایتکار تیلویزیون گؤرمه‌ییبسینیز، بلکه. بلکه ده گؤروبسونوز ها، آنجاق، دورومونوزدان هابئله یاشادیغینیز چاغین اولاناقلاریندان آسیلی اولاراق، اونلارین نه قدر جینایتکار اولا بیله‌جکلرینه وارماییبسینیز. سیز اینترنئت دونیاسینین آدام‌لاریسینیز. یوزلرجه ماهواره کانال‌لارینین دونیاسیندا یاشایییرسینیز. ایسته‌دییینیز فیلمی، باشا دوشه‌بیله‌جه‌ییینیز بیر دیلده، ایزله‌یه بیلرسینیز. سیز هئچ بیر زامان دیلینی باشا دوشه‌بیلمه‌دییینیز بیر فیلمه باخماق زوروندا قالا بیلمزسینیز.

📝آما من سیزی آنام ائوینه قوناق چاغیرماق ایسته‌ییرم. بلکه، بئله‌لیک‌له، نه دئمک ایسته‌دیییمی اؤز گؤزلرینیزله گؤره بیله‌سینیز. بو قوناقلیغا قاتیلماق ایسته‌سه‌نیز یالنیز یئرده دئییل، زامان‌دا دا یولچولوغا چیخمالیسینیز. قورخمایین! بو یولچولوق چوخ دا اوزون سورمز. یالنیز اوتوز ایل گئریییه قاییتمالیسینیز.

بیزیم ائویمیزده آغ-قارا بیر تیلویزیون وار ایدی. او دا یالنیز گونده نئچه ساعات چالیشاردی. یانیلمیرامسا هر گون آخشام ساعات بئشدن گئجه اون‌ایکی‌یه دک. او نئچه ساعاتی دا نه گؤرستدییینه توخونماق ایسته‌میرم. ذاتن بیزیم باشقا سئچه‌نیییمیز یوخ ایدی. هر نه گؤرستسه ایدی، ائله بیز ده اونا باخمالییدیق. توخونماق ایسته‌دیییم، منیم اؤز آنام‌دیر. لوطفن “تیلویزیونون سنین آنانا نه دخلی وار؟” دئیه، سوروشمایین. ائله سؤزون تملی بودور.

منیم آنام تام ساوادسیزین بیری ایدی. البته ایندی ده ائله‌دیر. نه بیر کلمه فارسجا دانیشا بیلر، نه بیر کلمه فارسجا باشا دوشه بیلر. آنجاق، هر زامان بیز بیر فیلمه باخاندا او دا بیزیم یانیمیزدا اوتوروب، تیلویزیونا باخاردی…

او زامان‌لار بو ایشین اونون اوچون نه قدر آغیر اولدوغونو آنلایا بیلمیردیم. بونا گؤره ده، ایندی‌لر هردن بیر دیلینی هئچ باشا دوشه‌بیلمه‌دیییم بیر فیلمه باخماق ایسته‌رم. ندنینی بیلدینیزمی؟ آنامین او گون‌لر نه‌لر چکدییینی باشا دوشمک اوچون.

منیم آنامین، ائوینده‌کی تیلویزیون‌دان لذت آپارماغا حاققی یوخ ایمیش. بوتون او ایل‌لرده، منیم آنام یالنیز کاراکتئرلرین چیغیر-باغیرلارینی، آنلامسیز سس-کوی‌لرینی، ندنسیز آغلاییب-گولمه‌لرینی ایزله‌مک زوروندایمیش. اؤزو ده چوخ اذیت وئریجی بیر حالدا. بو ایشین نه قدر اذیت وئریجی اولدوغونو اؤزوم سینامیشام. ائله بونا گؤره ده، آغ-قارا تیلویزیون‌لاردان نیفرت ائدیرم. جینایتکار اولدوقلارینا گؤره، منیم آنامین باشا دوشه‌بیلمه‌دییی بیر دیلده فیلم گؤرستمه‌لرینه گؤره! باتسین منیم آنا_دیلیمی باتیران تیلویزیون‌لار! ایستر آغ-قارا اولسون، ایسترسه رنگی!