اینسان اوره یینده کی بیر یارانین اوستونو نه قده ر اؤرتو- باسدی ائدرسه ده، وجودونون بیر یئرلریندن اونون آغریسی ائشیگه ووروب ، دیللندیره جکدیر.

انسانی البت کی، بیز نه قده ر گولدن – بولبولدن سؤز آچماغا، ایچ حسرتلریمیزی یانسیتماماغا چالیشیب، اؤزوموزو آیری یولا وورساق دا، حاقسیز یئره یئدییمیز یارالارین سیزیلتی سی جانیمیزین بیر یئرلریندن فیشقیریب، ایچیمیزی گؤسترمه یه باشلایاجاقدیر.

ایکی- اوچ ایل مدتینده تانیدیغیم و گؤروشدوغوم “آیریلیق” شاعیری درین، دوشوندوره جک لی خاطره لر بوراخدی. آنجاق بوتون خاطره لرین ایچینده درین حسرت لر ، درین دردلر واریدی.

تانیدیغیم گون چوخ سئوینمیشدیم، و اوندان اؤنجه دونیا شهرتلی شاعیریمیزین کیم اولدونو، هارالی اولدوغونو، حتی دیری اولدوغونو بیلمه دییمدن اوتانمیشدیم دا اؤزومدن سسیزجه سینه، او گون میلیونلار انسانین اوره یینی اوخشایان شاعیرین کیتابینا چوخ چتین لیکده مجوز آلدیغیمیزدا سئوینجیندن گؤزلری گولوردو.

شاعیرین ،بیزیم له “انتشارات پینار” اولاراق قرارداد باغلادیغی گون منی بیر رستورانا دعوت ائتمیشدی. شیرینلیک اولسون دئیه، شیرین – شیرین سؤزلرینی و خاطره لرینی دینله ییردیم. رادیو دا “محمود دست پیش” له چالیشان زامانلاریندان و “رشید بهبود اوف “ونایرایرانا گلیب، آیریلیق شعرینی اوخودوغو گونلری ائله شیرین وجانلی تعریف له ییردی کی آدام اؤزونو اولانلارین ایچینده حیس ائتمه یه باشلاییردی.

او گون اونا دئدیم کی “«اوستاد سیزین کیتابین مجویزینی حتما کی چوخ تئز وئره جکلر نگرانچیلیغا یئر یوخدور».

اودا :«بیلمیرم کی باخاق گؤرک نئجه اؤلور ، گؤره جه ییک آنجاق دئدی».

ایل اولدو آیریلیق شاعیرینین، آیریلیق کیتابینین یایما اجازه سینی آلا بیلک، آنجاق رشوه وئردیک ، تانیش تاپدیق، ممیزی نین ائوینه شیرینی آلیب استادلا برابر گئتدیک یئنه ده ائرکن آلابیلمه دیک کیتابین یایاما مجویزینی.

ماهنالار توتوردولار، هر دفعه زنگ ائله ییب سوروشدوغوندا، مجویز نه اولدو، هله خبر یوخدو دئدیغیم جاواب، ان چتین جاواب اولاردی.

ایلاهی گؤره سن بو کیشی تورکیه ده اولسایدی، قوزئی آزربایجاندا اولسایدی نئجه داورانیردیلار اونونلا؟

ایشی دوشدویو اداره لرده “فرهاد ابراهیمی” آدی کئچینجه هانسی ده یری وئریب، سایقیلی داورانیردیلار اونونلا؟ ایلده نئچه دفعه رادیو تلویزیون و باشقا مئدیالاردا آدی کئچیب، قوناق اولوردو؟ شعری وصنعتی نئجه ده یرلندیریلیردی گؤره سن سوروشوردوم اؤزومدن؟

ایندی بو کیشی تورکیه ده اولسایدی نئچه میلیون انسان نه دورومدا اولدوغونو بیلمک ایسته ییردی؟ نئچه فئستیوالین دعوتینی آلمیش و اؤدوله لاییق گؤرولموش ایدی؟

شبهه سیز دئولت منصوب لاری ائوینه گئتمیشدیرلر.
اما بو اینسانین یاشادیغینی بو گون ایران میللتی کی هئچ ایران تورک میللتی بئله بیلمیردی و اینانا بیلمیردی ائشیتدیینده.

کیتابینین مجوزی گلدییی گون دفتره گلدی بیر جعبه شیرنیله و بیر کورابازلی تانیشیلا، سئوینجیندن منی باغرینا باسیب، تشکور ائتدی. قیز آرتیق سنی دؤیمه یه جه یم دئدی، قورتولدون الیمدن دئییب، اوجا-اوجا گولوردو سئوینجیندن.

بیزده سئوینیردیک، ائله دیگی ضارافات لارا ایچین گولوردوک هامیمیز، مجویزین کارتینا دفعه لرجه باخیب، میزین اوستونه قویدو یئنی دن.

بوندان سونرا اوچ یازار آدلی کیتابی حاضیرلامالییق دئدی و الیمه بیر سیرا ال یازلاری بوراخدی.

الف. نورانلی، محمود دست پیش و فرهاد ابراهیمی” یه عایید اولان ال یازیلاریدی، منیم ایچین یئنه بیر تاپینتی دیر، “الف. نورانلی (احمد صادقی اشرافی) “او گوجلو یازارین نثرلرینین یاینلاماسی دا” فرهاد ابراهیمی نین” کیتابینین یاینلاماسی قده ر ده یرلیدی، شبهه سیز.

او گون بیر آز ضارافات و بیر آزدا جیددی اولاراق،:« اوستاد آرتیق صحنه لره چیخ ، کؤرابازی گنج لره بوراخ دئدیم»، اوزومه باخدی بیر گولدو، بیر آه چکدی.

دئدی کی:« منی او توپراق حایاتدا توتوبدورقیزیم ، عؤمرومو قویدوم او ویرانه کندی قیزیلا چئویردیم، گیریشینده “کورعباسلو” یازیلیردی، ایندیسه او ساختا تابلولاردان خبر قالماییبدیر آرتیق،.

“کؤرابازلی” یازیلیب دیر. یول گؤستره ن تابلولاریین هامیسینی آنا دیلینده یازدیتدیریب و ایکی بیت تورکجه شعر یازدیتدیرمیشام. او تابلولاردا، ایندیسه اوراسی چوخ گؤزل، و توریستی بیر یئره چئوریلیبدیر.

بیر میللتین کیملیینی تمثیل ائدن سیمگه لر باشقالارینین سیمگه سی اولاجاقسا، او میللت یوخ اولماغا محکوم یاشاییب، مظلوم اؤله جکدیر راحاتجاسینا،
— شریفه جعفری

من کندیمه دؤنوب تورپاغیمی یاشاتدیم ، بوردا قالسایدیم چوخدان اؤلموشدوم ایندی، دئدی. گؤزلریندن آخان یاشلاری یاواشجا سیلیب، ساکیت قالدی، هامیمیز سوسموشدوق، ائحح :« قیز بیزیم قدریمیزی بیلن کیمدیر بو مملکت ده دئدی؟».