Tufanlı, qarlı günlərdə tufan qarı sovuranda,

Qalaqlanmış xatirəmdə həsrət qələbə çalanda,

Ötüb keçən illərimdə ömür yadigar qalanda,

Hər dəyişən fəsillərin gəlişindən ruh alanda

Ağacları çiçək açan bahar üçün darıxmışam.

İncitək sözlər qoşulub, həzin laylatək süzülən,

Fərəh, sevincə dönüşüb həssas qəlblərdə düzülən,

Artıq körpə xəyallardan arzu, ümidi üzülən,

Gah yorulub, gah əzilən,

Anamın dizləri üstə sığal üçün darıxmışam.

***

Artıq keçmişə qovuşub zamanda izləri qalan,

Yaddaşda sözləri qalıb ürəkdə közləri qalan,

Düşündükcə qəlb evini gah güldürən, gah ağladan

Hədər gedən günlərimə həyəcanlı dəyər qatan

Fikirlərlə yoldaş olan darıxmağın özü üçün darıxmışam.

***

Böyütmüşəm gözümdə hər gördüyüm dağları,

Becərdim xatirəmdə dolaşdığım bağları

Mənliykən mənsiz qalan unutduğum çağları

Arzulayıb həsrətlə yaşadığım anları

Səssizcə unutmağın sözü üçün darıxmışam.