تورک دیلی تورک میللتینین آنا وارلیغیدیر. بو دیل اؤز وارلیغین عصیرلر بویو سوردورموش و سوردورمکده دیر و بئللیکله تورک میللتین هر هانسی بیر اؤزگه 
لییه ایمه دن، تاریخ بویو بوتون چاغلاردا اونو باشی اوجا آپارمیشدیر، آپاریر، یاشادیب و یاشادماقدادیر.
***
گونوموزه گلدیکده، تورک دیلی- تاجیک (فارس) آزینلیغینین بیر انگلیس کودتاسی ایله ایش باشینا گلدیکدن سونرا – یاساقلانمیش و بو یاساق سورولمکده دیر. گونوموزده اولان حوکومت، آدلارینی ایسلام حوکومتی قویسالار بئله، تملده یئنی بیر دییشیم اولمامیش و یوخدور. باشقا سؤزله، بالنیز تاج یئرین عمامه-یه وئرمکله تورک دیلی و کولتورو پهلویلر دؤنمیندن-ده آغیر بیر سورجه گیرمیشدیر.
بو گون، تورکلرین میللی اویانیشینین سونوجوندا، تورک دیلی و تورک کولتورونون قورونوب آیاقلانماسیندا بویوک آددیملار آتیلمیش و آتیلماقدادیر.
بو آددیملارین کولتورل بویوتو، بوتونلوکله حوکومت یاردیمی اولمادان، تورک میللتینین شرفلی و غئیرتلی بالالارینین اؤز-وئریلری ایله چیچکلنمیش و بوی آتماقدادیر.
تورکلر کولتورل چالیشمالارلا یاناشی، سیاسال گلیشمه لرده-ده اؤز گؤوده لرینی چئشیدلی قوروملار و پارتی لر یاراتماقلا، قاباریق بیچیمده اؤنه قویموشلار.
سؤزسوز، آنا دیلی ایسته یی باشقا سیاسال و ایقتیصادی ایستکلرله بیرگه، بو قوروملار و پارتی لرین ان اؤنملی ایستکلرینین بیری اولموشدور.
ایران تورکون ازلی و ایلکین اؤلکه سی و آنا بئشیگی اولموشدور، آنا بئشیگیدیر و هر زاماندا آنا بئشیگی اولاجاقدیر. تورکون اؤلکه سینده، تورک آزینلیق دورومونا دوشه بیلمز. تورکون دیلی ایراندا گرگ رسمی دیل اولسون. نه آز، نه چوخ.
گئنل اولاراق، آنا دیل ایسته یین گؤز اونونه آلاندا، بو ایستک ایرانین آنا یاساسینین ۱۵-جی ماده-سینین اوزرینده دورموشدور.
ایران آنا یاساسینا گؤز آخیداندا، اون دوققوزونجو ماده، ایراندا یاشایان لاری بویا و کیملیکلریندن و … آسیلی اولمایاراق ائشیت توتموشدور. آنجاق، ایران آنا یاساسین یازانلار بو دوغرونو اونوداراق و تورکون چوخونلوق اولما گئرچگین بیلرک، دولایی یول ایله – اون بئشینجی ماده اوزریندن- تورکلری اؤلکه ده چوخلوق اولماقلارینا باخمایاراق، آزینلیق دورومونا سالیب و بو چوخونلوغا -تورکلره- آزینلیق حقلرینی ده چوخ گؤرموشلر.
بیر باشقا یاندان، هر بیر تورک اون بئشینجی ماده-نی ایسته مکله، اؤز اؤلکه سینده اؤزونو آزینلق دورومونا سالمیشدیر و بو سورجی سوردورمکله، اؤز آزینلیغینا اوی وئرمیشدیر.
آنجاق، تاریخیمیزدن گلن گئرچکلری گؤز اؤنونه آلاراق، ایران تورکون ازلی و ایلکین اؤلکه سی و آنا بئشیگی اولموشدور، آنا بئشیگیدیر و هر زاماندا آنا بئشیگی اولاجاقدیر. تورکون اؤلکه سینده، تورک آزینلیق دورومونا دوشه بیلمز. تورکون دیلی ایراندا گرگ رسمی دیل اولسون. نه آز، نه چوخ.
