بو سورغونو ایکی یؤندن دوشونمک اولار: ندن کوردلره باش ساغلیغی وئردیم؟ ندن باش‌ساغلیغیمی کیرمانشاه آدینا دئییل، کوردوستان آدینا یازدیم؟
بیز آزربایجان ] تورک [ ملتی اولاراق، ایل‌لر بویودور قونشو ملت‌لرین طرفیندن اؤزل‌لیک‌له کوردلرین طرفیندن آجیماسیز آجی‌لارا معروض قالمیشیق. 
کوردلر بیزیم توپراق‌لاریمیزا گؤز تیکیب‌لر. آراسیرا سربازلیقدا اولان اوغول‌لاریمیزی قان‌لارینا بلشدیریبلر.
#ورزقان زلزله‌سینده دئمک اولار اونلارین چوخو سوسدو، هله بیر سیراسی بیزی آجیقلاندیرماق اوچون یاراماز-یاراماز سؤزلر ده پایلاشدی(باخمایاراق کی آز دا اولسا اونلاردان دا بیزه باش‌ساغلیغی وئرنلر اولدو).
بونا گؤره منیم هابئله منیم کیمی‌لرین کوردلره باش‌ساغلیغی وئردییینه آجیقلاندیغینیزی یاخشی باشا دوشه بیلیرم.
آنجاق، لوطفن سیز ده”باش‌ساغلیغی” وئرنلری “نه تئز کئچمیشی اونوتدونوز” دئیه‌رک، قینامایین! بیز کئچمیشیمیزی اونوتمامیشیق. کئچمیشیمیزی اونوتسایدیق ایندی بو یولدا دئییلدیک. آنجاق، کئچمیشی اونوتماماق #پاسیو_رئاکسیا گؤسترمک آنلامیندا دا دئییل.
ایستر سیاست دونیاسیندا، ایسترسه انسانلیق دونیاسیندا باشقا نورم‌لار دا واردیر. بیز تورک اولاراق اینسانی #اردم‌لریمیزی کوردلردن دئییل، اؤز زنگین کولتوروموزدن آلمیشیق. بیز کولتورسوز بیر #ملت دئییلیک کی نئجه داوراندیغیمیزی اؤزگه‌لردن اؤیرنک! پاسیو سیاست‌لر، هابئله پاسیو داورانیش‌لار #گلیشمه_میش_ملت‌لرین پئشه‌سی‌دیر.
”داش دئییلدیم، داشی گؤردوم داش اولدوم”. آتا-آنالاریمیزدان بیزه گلیب چاتان بو سؤز، “باش ساغلیغی وئرمه‌یه قارشی چیخان یولداش‌لاریمیزین دورومونو آنلادیر، بلکه. آنجاق، ائله بو سؤز ده گؤروندویو کیمی بیزلر هئچ زامان داش اورک بیر ملت اولمامیشیق، اولمامالیییق دا. سئویملی یولداشلار، بیز #فاشیست دئییلیک! بیز فاشیزمین قوربانلاریییق. گؤزله‌یک بو یولدا چکدیییمیز آجی‌لار بیزیم اؤزوموزو فاشیسته دؤنوشدورمه‌سین!
سؤزلریم یانلیش آنلاشیلماسین لوطفن! من کیمسه‌نی فاشیست آدلاندیرماق ایسته‌میرم. آنجاق بیر #اویاری اولاراق وورغولاییرام نئجه داوراندیغیمیزا گؤز-قولاق اولماساق، #فاشیزم_باتلاغینا باتا بیلریک. اؤزگه‌لره #اؤلوم ایسته‌ین بیر ملت هئچ واقت #اؤزگور یاشاما چاتا بیلمز. قولاغیمیزین دیبینده‌کی فارس‌لار بو سؤزومون آیدین اؤرنک‌لری ساییلا بیلرلر.
سیزین چوخونوز منی تانیییرسینیز. اؤزومو تانیدیغیم گوندن بری داها چوخ کولتورل قونولاردا چالیشدیغیما باخمایاراق، #کورد_تئروریزمینه قارشی، بلکه ده سیاسی چالیشقان‌لاریمیزدان داها آرتیق یازیلار یازمیشام.
هر زامان اونلارین خطرلرینی ایزله‌ییب، خاطیرلاتمیشام. نئچه ایل اؤنجه، ائله بو زلزله وورموش کیرمانشاهدا، بیر سیرا کورد چالیشقان‌لاری ایله گؤروشدویومده دئدیییم سؤزو بوگون بوردا وورغولاماق ایسته‌ییرم: “من قان‌لارین تؤکولمه‌سینه قارشییام، آما #تورپاق‌لاریمیزا #شهرلریمیزه گؤز تیکن‌لری اویاریرام کی ائله بیر گون گلیرسه بو گون قارشینیزداکی الینه #قلم آلان بیر #یازیچی، قلمی یئره قویوب الینه #سیلاح گؤتوره‌جکدیر. بیز هامینی قارداشلیغا چاغیریریق، آما قارداشلیق قورال‌لارینی پوزانلارا اؤزلری ایسته‌دیکلری کیمی جواب وئرمه‌یه هر زامان حاضیریق”.
سؤزو چوخ اوزاتماییم دئیه، سورغونون ایکینجی بؤلومونو قیسا بیر سؤرغویلا یانیتلاماق ایسته‌ییرم.
دیلیم لال، بو زلزله #سونقوردا، #بیجاردا، #قوروه‌ده یاخود #آستارادا باش وئرسه‌یدی، سیز کیرمانشاه، کوردستان، گیلان آدینا باش‌ساغلیغی وئره‌جکدینیز، یوخسا آذربایجان آدینا؟ بیلدییینیز کیمی بیزیم اوستان‌لار آراسی چکیلمیش سینیرلار بو اؤلکه‌ده یاشایان ملت‌لرین گؤسترگه‌سی دئییل. باشقا یؤندن من کوردوستانین هابئله کورد ملتینین وارلیغینا اینانیرام، نئجه کی آذربایجانین هابئله آذربایجان ملتینین وارلیغینا اینانیرام. من اؤزومه ایسته‌دیییمی اؤزگه‌لره ده ایسته‌ییرم. حتی اینانیرام کی بیزیم ایستک‌لریمیزین گئرچکلشمه‌سی آز-چوخ بیربیرینه باغلی‌دیر. البته، بیر داها وورغولاییرام کی بیز بوتون ایش‌لریمیزده #آذربایجان_ملی_ماراق_لارینی گؤز اؤنونه آلمالیییق. وورغولادیم اینانج‌لارا باخمایاراق، مادام کی کوردلر آذربایجان ملی ماراق‌لارینی هابئله آذربایجان ملی تورپاق‌لارینی هده‌له‌ییرلر، اونلاری بیر دوشمن گؤزونده گؤرمکدن باشقا یولوموز یوخدور.
آنجاق، اونوتمایالیم کی بیز هئچ بیر ملته قارشی دئییلیک. بیز کورد ملتینه ده قارشی دئییلیک. بیز کورد تروریزمینه قارشیییق. بیز کورد_آرتیق_تاماهلیغینا قارشیییق. گئرچک دونیادا بونلارین چوخ زامان اوست-اوسته دوشه‌بیلدیکلرینه باخمایاراق، #قاورام_لار_دونیاسیندا بونلاری بیربیرینه قاتمامالیییق.
بوتون بونلارا باخمایاراق، بو زلزله‌دن تؤرنمیش آجی‌لارا اوزولمک، قورو بیر دیل ایله ده اولسا آجی‌چکمیش انسان‌لارا توختاقلیق وئرمک بیز #تورک‌لرین اینسانی اردم‌لریندن ساییلا بیلر. بیز تورک ملتیییک، یئرینده ایپکدن اینجه، یئرینده ایسه قیلینجدان کسرلی! بونو دوستلاریمیز دا بیلمه‌لی‌دیر، دوشمن‌لریمیز ده!
ساغ قالین
ی س: #خوی شهرینده، #آذربایجان ایگیدلیک اؤرنه‌یی #پوریای_ولی مزاریندا
قایناق:محمد رحمانی فر بیگین قئیس بوک یاپراغیندان
