بو حیکایه
سنه گلسین
ای ائینالی اته یینده
اسن چیچک
محمد رضا لوایی
هاوا سویوق. ترن لر باشیمدا اوچور. ایستارباکسدا ایکی قارادریلی بیر آغ قیز اوستونده بیچاق چکیرلر. ترامپ تی وی دن قوزئی کوْره حاققیندا بیانات وئریر. بیر ماسانین باشیندا ایکی اوچ کیشی اوْرتادوغودا یئنی بیر دؤنمین باشلانماسی حاققیندا مذاکیره لر آپاریرلار. او اوچ کیشی دن بیری اؤزونه رهبر دئدیینده شاراب بارداقلاری هاوادا اوچور. بارداقلاردان بیری اؤنجه باشیمی یاریر سوْنرا دووارداکی دونیا خریطه سینه چارپیلیر. خریطه قان قیرمیزیسی اولور.
– شیت، فاک یو…
اورتادوغونون یئنی ساواشی همن بوماسادان باشلاییر. سونرا چک لر یازیلیر آنلاشمالار یاپیلیر. بیر آتاری اوْیونونون ایچینده یه م کیمی…
بیر مئساژ گلیر. ایستارباکسدان اوزاقلاشیر شه هه رین ایچینه دالیرام. تلفونومو آچیب اوخویورام. بیریسی منه افندیجه سؤیوش وئرمک ایسته میش. بیر سسلی شعریمدن بیر تیکه کسیب منه آتیب.
…الیمیزی قارنیمیزا قوْیوب یاتاقلارا دوشه جه ییک
هم ده افندی افندی دوشه جه ییک…
تلفونو آچمیشکن خبرلری اوخوماق ایسته ییرم.
بیرینجی خبر منی آلیر گؤتورور.
« گونش کافه سینده کیتابخانا آچیلدی. »
شئیدا دئدی: گل بو پارچاچی دان بیر شئی سوْروشوم. ایچری گیردیک. او گون بازار چوخ ایستی ایدی. پارچاچی دئدی:
اوستاد شئیدا گلیبدی
منی لاییق بیلیبدی
اوزومو شئیدایا دوتوب دئدیم: اوستاد بونودا ادبییات اوجاغینا اکله.
شئیدا دئدی: سؤز آتما، قوی چؤره ییمی چیخاریم. بیلیرسن نه اولوب؟ بو گون بیزی فرضی کافه سیندن دیشلادیلار. گونش کافه سینه کئچمه لییک…
دئدیم: بلکه بیزیم اوچون گونش داها خئییرلی، آمما توْپلاندیغیمیز هئچ بیر یئرده امنییت یوخدور.
او گوندن شئیدا ایله آرامیزا قار یاغدی آمما گونش کافه سی یئرینده ایدی. ان سوْن او کافه نین اؤنونده یاخالاندیغیمی خاطیرلاییرام. سوْنرا گونشله منیم آراما آیریلیق دوشدو…
میشیگان میشیل میشیل اویویوب. ساحیلده بیر کئفلی گنج اوغلان قیز دوستونون قوجاغینا قوسوب. بیر تلقیرام کانال قوروپلاریندا آتیشما وار. بیر ساحیله باخیر بیر تلفونا باخیرام…
تبریزدن بیر شاعیر مئساژ یوللاییر:
– اوستاد یئرین بوْش. دونن انجمنلرین بیرینده سیزین صؤحبتینیز ایدی…
اینستاقرامدا بیر فارس بیر پوْستومون آلتینا یازیر:
– ایستر آنکارادا اول ایستر شیکاقودا، سنی بولاجاغیق…
اوغلان یئنه قوسور. بیر توریست اؤزو اؤزونه میریلدانیر:
– او قوجاغا قوسولورمو؟
قوروپلارین بیرینده آلاداغلارین شکیللرینی پایلاشیرلار.
ساحیله دوشورم.
سانکی شیکاقونو باجاقلاریما دویومله ییبلر.
