بیر نئچه گون بوندان اؤنجه آلمانا گلن تانیدیغیم میللی فعاللاریمزدان بیریسی منه دئدی کی شریفه خانم خبرینیز وارمی کی، تشکیلاتلار و تانینمیش فعاللاریمیزین قبول لانماسیلا گاموح بایراغی میللی حرکتین بایراغی اعلام اولوناجاقدیر؟ ائله بیر شئی دن خبریم یوخدور دئدیم، دئدی هه اینانین منه ، همیده بو ایشین چوخ زحمت لرینی “مهدی نعیمی” چکیب دیر و ۳ آی دیر بو مسئله واردیر.
هم سئویندیم هم اینانا بیلمه دیم، آللاهیم یانی بیزیم نهایت ده بئله بیر گونوموزده واریمیش کی بیر مسئله ده بیرلییمیز ایچین چوخونلوقلا بیر ایشه بیرلیکده قول آتا بیلسین لر،و نه یاخشی کی، بانی سی ده، مهدی نعیمی اولموش، یوخسا باشقاسی اولسایدی چتین قبول اولوناردی، چون کی مهدی نعیمی طرف سیز و صادیق بیر میللی فعال دیر وهر کس بونو یاخشی بیلرده.
آنجاق ایکی گون چکمه دی گئرچک لشدی و منیم آن سئوینجی لی گونوم اولدو او گون، چون کی اول – آخیر بیزه بیر بایراق سئچیلمه لیدیر و بوتون عاغیل، منطق و شعوروموز بونو گؤستریر کی بو گون آن یاخشی سئچیم گاموح بایراغیدیر کی هر یئرده باشقا بایراقلاریمیزدان اولدوقجا داها چوخ تانینمیشدیر ، حتی سهو ائتمیرسم سه بیر زامانلار “ماحمود بیلگین” بئی طرفلریندن بو بایراق سازمان ملله ده سونولموشدور و آنلادیلمیشدیر.
هله بو مسئله دن کئچدیک ده کی بو بایراق داها اویقون دور،بو گون لرده اعتراض دا بولونان دوستلاردان سوروشورام سیزی اؤز ویجدانینیز، بؤرکونوزو قارشینیزا قویوب دوز قضاوت ائدین بیر کره لیکده اولورسا کی، بیز گلیب بو مسئله نی اعلام ائده رسک، نه بیلیم مذاکره یه قویارساق، سونرا تشکیلاتلاری بیر یئره توپلاماق ایسترسک یانی اونلارا دعوت نامه یازارساق (البته منظوروم من یوخ بو ایشی گؤرمک ایسته ینلر)، سونرا بونو بیر یئرده بیر مدیادان اعلام ائدرسک ، بیزیم ایچیمیزده بیر درصد بئله اولسون دا اولان ایشدیر می؟ نئچه ایل آپاراجاقدیر تا آتیشمالار سونا چاتا و هر کس بو بایراغا امضا آتا ؟
۱- هانسی تشکیلات اؤنه دوشسون کی، بوتون تشکیلاتلار و بعضی تانینمیش فعاللار اونا اعتراض ائتمه دن کی ندن فلان تشکیلات بو سؤزو اورتایا آتیب، هدفی ندیر، نه ایش گؤرمک ایسته ییر ووو دئمه دن اونون خئیرلی ایشینی خئیر سانیب قبول ائتسینلر.
۲- گئرچکدن هانسی نیز اینانیزسینیز کی سیزلری بیر یئره توپلاییب و بو ایشی گؤرمک ایچین دعوت ائدیرسه لردیرلر، دعوته اجابت ائدیب ، گئدیب دونن کی انسانلا کی بیر بیرینیزه الدن گلن اهانت لری وتخریب لری ائدمیشسینیز، بیر ماسانین دوره سینده اوتورا بیله جکدینیز می؟ اؤزونوزده بیلیرسینیز کی ان آزی بو زاماندا اولا بیلمه یه جکدیر.
۳- بو مسئله دالدادا مهدی نعیمی گؤردویو کیمی اولماسایدی دا، بلکه عمومیتده اعلام اولونسایدی و هامیدان نظر ایسته نیلسه ایدی ، بونا بیر درصد بئله اینانیرسانیز کی بو ایش حتی بیر نئچه ایل سورن دن سونرا بیر نتیجه یه یئتیشه جکدی،؟ یوخسا داهادا انسانلاریمیزین بیر بیرینه سالدیریلماسی چوخالاجاقدیر؟
۴- اگر بیزه بایراق لازیم دئیلسه بس ندن اونلار بایراق طرح اولونوب و بو گونه قده ر هئچ بیرینیز زامانیندا بونو یانی بایراق یارادیلان گوندن، بایراق یارادن لارین کسکین قارشیلاریندا دورمادینیز، دورمادینیز چون کی سیزده لازیم اولدوغونو یاخشی بیلیردینیز .
۵- انصافینیز یار ائده رسه دوشونه بیلرسینیز کی،بو گون بو ایش گوناز تی وی ده اعلام اولوندو،گونازدان باشقا هانسی مدیامیز گوناز تی وی دن داها یاخشی و تانینمیش اولدوغوندان بو ایشی یایاجاقدیر و همیده صاباح توتاق کی هامی نین اتفاقیلا بو ایش مقصده چاتدی و مدیالاردان اعلام اولونماسی زامانی گلسه ایدی او گونازدان یایلماسینا سئوینه جکمی دینیز؟و هئچ بیر باهانا توتمویاجاقدینیز می ؟
البته “ساو تی وی”نین ده زحمت لری اؤز یئرینده محفوظ دورو ساغول سونلار اما گوناز داها دا تانیمش دیرو یایقین دیر ایندیسه سیزین گونازی سئومه دیینیزایچین بو اؤنملی مسئله نی اولومسوز گؤسترمه نیز دوغرومو؟
۶- سیز عزیز دوستومدان ، قارداشیمدان و ساواش داشیمدان سوروشورام،هر فرصتده دئییرسینیز کی میللت سیلاحلانمالی و آرتیق عمله کئچمه میز لازیم، سلاحلی بیر تشکیلاتا بایراق گرک میر می ؟ اگر بوگون کی قوزئی آذربایجانیمیزین بایراغینی قصد ائدیرسینیز سه آیا او بایراغی نماد ائدرک بیر سالدیری دا و مقاوت ده بولونورساق، او بایراغی تمثیل ائدن مستقل مملکت، بین الخالق جامعه سینده محکوم اولمور می ؟ آیا اصلا بو مستقیل یاریمیز، بونا راضی اولا بیلر می ؟
۷- یئنه سنه دئییرم عزیز قارداشیم کی سنین جاندان، روح دان و قاندان بیر میللیتچی، بیر میللی حرکت ایچین فدائی اولدوغوندادا ایینه اوجو قده ر شوبهم یوخدور، سندن سوروشورام ندن بس سیز صداقت سیزلیک گؤستریرسیز، سؤزونوزو و فیکرینیزی سؤیله مک و بیر کس لری محکوم و بو ایشی خنثی ائتمک ایچین بیر نئچه تشکیلات و غیر فعال جمعیت لرین آدی نی دال بادالا دوزوب و اونلارین بو ایشدن خبرسیز اولدوقلارینی سویله ییرسینیز کی بیر عده نین ده بئنی نی قاریشدیریب، قرارسیزلیق دورومونا سالیرسینیز؟.سیزدن ان آزی من بونوگؤزله مزدیم هئچ.
اما بیر نئچه گون بوندان اؤنجه یازدیغیم یازی ایچین بیر سیرا اعتراض لار فیس دن ، تلگرامدان و باشقا یوللاردان منه گلدی،کی اولدوقجا جاوابلاماغا چالیشدیم ، اما بیر نتیجه یه یئتیشدیم، اودا بو کی:
بیرینجی-مخالفت ائدن لر حقیقتن پرچم و اونون ماهیتی ایله مخالف دئییلر بلکه شخص لر و سئومه دیک لری و ازیل دیکلری شخصلر طرفیندن، بو ایش اؤنه سورولدویو ایچین بو ایشی قبول ائتمک ایسته میرلر، زیرا بعضی زامانلار حاقلی اولاراق بعضی اینسانلارین عمللریندن ضرر گؤرموشلر و حتی حرکتین ضرره اوغراماسینی حس ائتمیشلرده، اما بورادا اوزاقلاری گؤرمک ایسته مه دن بوتون باخیش لارینی کی نه اولدی فلان شخص بو ایشین اولماسینی ایسته دی و ندن فیلان مدیادان بیرینجی اعلام اولوندو؟ بو ایشی غیر مشروع ساییب و مخالفته باشلاییرلار .((البته مالاسف بیزیم میللی حرکت ایچینده ده هر بیر یازی یا و یا اولایا مخالفت گؤسترمک و یا ترسینه حرکت ائتمک مد کیمی اولوبدور و ائله گؤسترلیر کی بو آداملار چوخ آییق و آیدین انسانلاریمیزدیرلارف منه قالیرسا بونلار “فعاللان همیشه معترض” دیرلر.البته کی اولماقلاری دا بعضن ده یاخشی دیر)).
اما بیر سیرا تانینمیش فعالاریمیزدان حتی بو شخص لری لن یاخشی اورتاملاری اولماسادا، حرکت ایچین آلاه خئیرلیسینی وئرسین دئییب، یاخشی گله جه یه اومود بسله دیلر.
ایکینجی- بو کی دوستلاریمیزدان بیریسی منی محکوم ائله دی کی، نه قده ر پول آلمیشسان یازی یازماق ایچین ؟ بو جمله لرین مصداقی آرتیق، اماما یامان می دئدین ؟ جمله سینه و سوچلاماسینا بنزه ییر و آرتیق تاثیرین ده الدن وئریب دیر، من آچیق و آیدین سویله ییرم کی منی سئویندیرن و یازدیران ایناجیم دیر کی بیزی بیر یئره توپلاماق و مینلر حاشیه لی سؤزلریمیزی بیتیرمک و گوجوموزه هدف و شور وئرمک ایچین بیزه بایراق لازیم دیر، وارلیغیمیزی الده ائتمییمیز زامانا قده ر. و من نه کیمسه یه آرخا دورماق و اونا اؤزومو شیرین لشدیرمک ایچین و نه ده کیمسه دن قورخماق ایچین یازمیشام، من ساده جه بونا ایناندیغیم ایچین کی دفعه لرجه اونجه دن بونو دیله گتیرمیشم حتی بیر طنز شعر قالیبین ده،”میللی حرکت جان سنه قوربان بیزی بوش وئر” آدلی شعرله :
بیان ائتمیشدیم،
اینانجیم ایچین احتیاطا گرک بیلمیرم، اوتوروب آرخادان ایزله ین ده دئییلم کی انسانلاریمیزین باخیشی و داورانیشی نئجه اولاجاقدیر اگر چوخونلوقلا قبول لانیرسالار، منده یازارام و سئودیره رم اؤزومو، یوخسا یازارسام شاید ایندی محبوبیتیم آرادان گئدر و نئچه نفر منه سالدیرا بیلر، یوخ من اینانجیم و هدفیم ایچین نه محافظه کار و نه ده حیله کار و نه ده قورخاق و نه ده مین اوزلو اولا بیلرم و بیر جانیم وار اودا میللی وارلیغیما ارمغاندیر. و شوبهم یوخدور کی زامانلا هر کس بو بایراغی قبول ائده جکدیر و ائتمه ینلر ده هئچ ائتمیه جکدیر .
سایقی لاریملا .
