آزربایجانین میلّی قهرمانی بابک خرّمدین‌ین دوغوم گونو
و ۱۳۸۳-۱۳۹۷  جو ایللرده بابک قالاسی مراسیمیندن خاطیره‌لریم

بو ایل یعنی ۱۳۹۷ -جی ایل تیر آیی‌نین ایکینجی پنجشنبه- جمعه‌سینه و آزربایجانین تاریخی قهرمانی خرّمدین بابکین دوغوم گونونه داها بیر نئچه ساییلی گون قالدی.

طبیعی کی،بابکین دوغوم گونو مراسیمی آزربایجان تاریخینده اؤنملی گونلردن ساییلیر. بابکین دوغوم گونو گونئی آزربایجاندا ایلک دفعه و توپلوم حالیندا ۱۳۹۷- جی ایل شرقی آزربایجانین کلئیبر شهری یاخینلیغیندا و قاراداغین گؤزل طبیعتی قوجاغیندا یئرله‌شن،میلّت یانیندا«بابک قالاسی» آدی ایله تانینان لاکین تاریخده آدی «بذقالاسی» یازیلان یئرده و یوزمیندن بلکه چوخ انسانین اشتراکی ایله و ایران اسلام جمهوریسی‌نین آنایاساسی‌نین ۱۵،۱۹و ۴۸ -جی ماده سی‌نین اجراسی ایسته‌یی ایله باشلاندی.

۱۳۸۰-جی ایل بو مراسیمه قاتیلانلارین سایی چوخالیب ۳۰۰ مین نفره قدر تخمین ائدیلدی؛ ۱۳۸۰- جی ایلین مراسیمینده آزربایجانین میلّی قهرمانی‌نین دوغوم گونو و ۲۲ ایل عباسی خلیفه‌سی استبدادی علیهینه مبارزه‌سی یوزمینلر اشتراکچیلار طرفیندن قوتلاناراق موغان فعاللاری طرفیندن قالادا و «قالادره‌سی» آدلانان مکاندا بو تاریخی حادثه حاقّیندا چیخیش ائتمک،شعر اوخوماق و موسیقی چالماق اوچون چیخیش تریبونودا حاضیرلانمیشدی کی،چوخلاری بو گون مناسبتی ایله چیخیش ائتدیلر و منیمده بو چیخیشدا پاییم اولدو.

بونلارین یانیندا ایسه اوزون پارچادا و ۱۴ ماده‌دن عیبارت، اشتراکچیلارین گؤزو قاباغیندا و آغاجلارا آسلانان پارچادا آزربایجان میلّتی‌نین اؤنملی ایستکلری او جمله‌دن آزربایجان تورکجه‌سی‌نین ایراندا ایکینجی رسمی دیل اولاراق ابتدایی، راهنمایی، دبیرستان و بیلیم یوردلاریندا (دانشگاهلاردا) تدریسی‌نین اجباری اولماسی ایسته نیلمیشدی.

۱۳۸۱-جی ایلده بابک قالاسی مراسیمینه گئدنلره و قالادا مراسیمین کئچیرمه‌سینه مختلیف تضییق‌لر و مانعه‌لر یاراندیغی حالدا یئنه اشتراکچیلارین سایی چوخالیب مراسیمه آپاریلان میلّی-مدنی ایستکلر پلاکاردلاری هم آرتیب هم تورکجه و هم انگلیسجه یازیلمیشدی؛ بو تضییق‌لره باخمایاراق قالادا مختلیف و چوخلو مدنی- فرهنگی برنامه‌لر کئچیریلمیشدیر.

۱۳۸۲-جی ایل بابک قالاسی مراسیمی‌نین اؤزل بیر حال و هاواسی واریدی،قالایا گئدن بوتون اوتوبوس، مینی‌بوس و اؤزل مینیک ماشینلاری کئچن ایللردن نئچه قات آرتیق و دقیق کلئیبر یاخینلیغیندا ساخلاییب مسافیرلرین یانیندا اولان هرجور پلاکارد،کیتاب، نشریه،جزوه، موسیقی آلت‌لرینی آلیب ساخلاییردیلار.

بونونلا بئله بو ایل، بابک قالاسی یاخینلیغیندا و «هتل بابک» آدلانان مکانین اطرافیندا موقتی نظامی پادگان یارادیب بو پادگاندان باندلاردان دائما و گوجلو فارسجا نوحه سسی یاییردیلار کی،هتل اطرافیندا و اشتراکچیلار طرفیندن اجرا اولان آزربایجان مدنی – فرهنگی، موسیقی و تیاتر سسینی ائتگی آلتینا آلسین.
«بابک هتلی» اطرفیندا چوخلو نظامی چادیرلارینا اوخشار بوش چادیرلار قورموشدولارکی، مراسیمه گلنلر اؤز چادیرلارینی قورماغا بوش یئر تاپماسینلار!

آمما بونونلا بئله و بئله بیر روانی و آغیر دورومدا یئنه پنجشنبه گونونون آخشام اوستو ۱۲ تیر ۱۳۸۲ تاریخینده اشتراکچیلار طرفیندن بابک هتلی اطرافیندا تیاتر، شعر و موسیقی مراسیمی اجرا اولدوقدان سونرا اؤلکه ایچی و بین الملل قانونلاری چرچیوه‌سینده اسلام جمهوریسی‌نین آنایاسا سی‌نین ۴۸،۱۹،۱۵،۹ -جی ماده‌لری‌نین اجراسی و باشقا میلّی-مدنی ایستکلر، او جمله‌دن تورک دیلینده آکادمی (فرهنگستان) یارانماسی ایسته‌یی ۱۲ ماده‌دن عیبارت اوخونوب اشتراکچیلار طرفیندن تایید عنوانیندا آلقیشلاندی.

مراسیمین ایکینجی و قالایا گئتمه گونو جمعه ۱۳ تیر ۱۳۸۲ ایدی. سحر چاغیندان « بابک هتلی» آدلانان مکاندان قالایا طرف گئتمه‌یه آزربایجانین مبارز قهرمانی بابکین دوغوم گونونو قوتلاییب بابک قالاسی ذیروه‌سینه قالخماغا قادین‌- کیشی، یاشلی -گنج و حتی اوشاقلاردان اوزون سیرالار و صف‌لر دوزلمیشدی؛ ماراقلیسی بوراسیدی کی، کلئیبر شهری گیریشینده ماشینلاری، مسافیرلری و حتی خانیملارین ماکیاژ چانتالارینی یوخلاییب نظرلرینه گلن شبهه‌لی هر بیر یازیلی کاغیذی‌دا آلیب ساخلادیقلاری حالدا قالایا طرف حرکت ائدن گنجلرین اللرینده اوزون پارچالاردا و ائنلی مقوالاردا یازیلمیش بو قدر تورکجه و انگلیسجه میلّی- مدنی شعارلارین نه جور قالایا گتیریلدیگی آدامی حیرته سالیردی!

حیرت او زامان چوخالدی کی، اشتراکچیلارین اکثری قالانین بئلینه چاتاندان سونرا، اوزونلوغو بلکه ۴۰-۵۰ و ائنی ۷-۸ مترلیک بیر بایراق آچیلدی! بایراغی اشتراکچیلارین اکثری باشلاری اوزه‌رینده گؤتوروب اوجا سسله : «آزربایجان بایراغین موبارک» شعاری ایله بابک قالاسی‌نین ذیروه‌سینه قالدیردیلار!

اطرافدا اولان اشتراکچیلاردان سوروشدوقدا بو بایراق نه بایراغی‌دیر؟

دئدیلر: «میلّی حرکت بایراغی». یعنی هر بیر حرکت و جریانین حتی خصوصی شرکتلرین اؤزونه بیر سمبل، نشانه و بایراغی وار، بیزیمده میلّی- مدنی حرکتین بوندان سونرا سمبل، نشانه و بایراغی بو اولاجاق!

اشتراکچی او قدر چوخ ایدی کی، قالا ذیروه‌سینه قالخماغا هامییا یئر یوخودو، آمما بایراغی قالانین ذیروه‌سینه قدر قالدیردیلار.
۱۳۸۳-جو ایلدن داها بابک قالاسی مراسیمینی کئچیرمه‌یه اجازه وئرمه‌دیلر، قالایا گئدنلرده مراسیم کئچیرمه‌دن امنیّتی قوه‌لر آراسیندا گئری دؤندولر و ۱۳۸۴- جو ایلدن داها بابک قالاسی مراسیمی گونلری یعنی تیر آیی‌نین ایکینجی پنجشنبه و جمعه گونلری قالایا گئتمک یاساقلاندی !

حسن راشدی: ۸ تیر ۱۳۹۷