اؤن سؤز
مئدیانین اؤنه مینی و ده یرینی بیلمه ین کیمسه یوخدور. مئدیا اوزمانلارینا گؤره، مئدیانین ائتگیسی دونیادا اولان بوتون سیلاحلاران داها ائتگین و چوخ دریندیر.
بئله کی بو اوزمانلار گؤره، مئدیا آراجلاری- تی وی، رادیو و … بیر گوجلو سیلاحا بنزه ر. بو گوجلو سیلاح گیریلمز قالالارا، چوخ راحاتلیقلا گیریب و اونلاری ایچریدن ییخیب و قالالاری ایچریسیندن فتح ائده رلر.
مئدیانین درین ائتگیسی اوزره، آزادلیق رادیوسونون رولون شوروینین ییخیلماسیندا و یا سی ان ان(CNN) و بی بی سی(BBC)-نین رولون کؤرفز ساواشلاریندا چارپیجی اؤرنکلر کیمی اورتایا قویماق اولار.
حکومتلره گلدیکده، يئنه ده مئدیا اوزمانلاوی اینانیرلار کی بیر اؤلکه نی حکومتلر یؤنتمز، بلکه مئدییا یؤنلتر. مئدییا کیمین الینده ایسه، حگومتده اونون الینده دیر.
بو گئرچگی گؤز اؤنونده توتاراق، ممالک محروسه ده مئدییا و اونون گوجو، اؤلکه اؤندرینین الینده اولماسی هئچ تعجب دوغورمور.
۱.دونیا مئدیاسی
بؤیوک گوجلر اؤز ماراقلاری و قازانجلارینا اویغون اولاراق گوجلو مئدییالار یاراتمیشلار. لندن، واشینقتون، موسکو، بروکسل و پکن هر زامان اؤز ماراقلارین، قازانجلارین و پایلارین، مئدیا آراجیلیغی ایله قورویوب، ساخلامیشلار و ساخلاماقدالار.
۲-ممالک محروسه( ایران) و اورتا دوغونو، اؤز ائتگیسینین آلتینا آلان مئدییالار.
۲.۱- انگلیس مئدییاسی: – اینگلیسجه بی بی سی و اونون چئشیدلی داللاری اورتا دوغویا باخدیقدا، اوردا اولان مئدییالارین صاحیبلری و دؤلتلری اینگلیسلرین الی ایله قورولموشدور. عربلر، ایسراییل و ممالک محروسه ده اولان فارس آزینلیغی اینگلیس یاردیمی ایله عثمانلی و قاجار ایمپراتورلوقلاریندان اورتایا چیخمیشلار و گونوموزده-ده بو گونون گونجل دورومونا و چاغیمیزا اویغون اولاراق، اینگیلیسین مستعمیره لری لر.
بو دؤلتلر و اؤلکه لر قورولدوقلاری گوندن اینگلیسین ماراقلارین و قازانجلارین دونیادا اؤزللیکله اورتا دوغودا ساخلاماقدا و قوروماقدالار.
بو مئدیالارین آدلاری، ساحیبلری و دولتلری دییشیک اولسا بئله، آرالاریندا اولان آیریشما، یالنیز قاییقجی ساواشلاری و یا زرگری ساواشیندان باشقا، آیری بیر قونو اولمامیشدیر.
باشقا سؤزله سؤرون تام اؤزو و دوزو، بونلارین هامیسینین قوللوقلوق ائتدیکلری یئر تام عینیدیر-لندن-.
۲.۲- واشینقتون مئدییاسی:
– وی او ائی(VOA) و اونون چئشیدلی داللاری – سی ان ان ( CNN)و اونون چئشیدلی داللاری – رادیو فردا یا آزادلیق رادیوسو و اونون چئشیدلی داللار
و …
واشینقتون مئدییاسی، آمریکانین ماراقلاری و قازانلاری دوغرولتوسوندا دونیا و اورتا دوغودا چالیشماقدادیر. بو مئدییانین ان بؤیوک رقیبی اورتا دوغودا اینگلیس مئدییاسی دیر.
۲.۳- روس مئدییاسی:
-ایسپوتنیک و اونون چئشیدلی داللاری
– بوگونکو روسیه (Russia Today) و اونون چئشیدلی داللاری
– تاس خبر آژانسی و اونون چئشیدلی داللاری و …
بو مئدییالار ممالیک محروسه ده، اورتا آسیادا و اورتا دوغودا روسلارین ماراقلارین قوروماقدالار. آنجاق ممالک محروسنی گؤز اؤنونه آلدیقدا، روس مئدیاسی اینگلیس و آمریکا مئدییالاری کیمین یایغین دئییللر.
۲.۴- بروکسل یا اوروپا مئدییاسی:
– یورونیوز و اونون چئشیدلی داللاری
– فرانسه رادیوسو(RFI) – فرانسه ۲۴ (FRANCE 24) – آلمان (DW)
و …
اوروپادان یاییلان مئدییلاریندا اؤزلزینه گؤره ایزله ین لری واردیر و اوسته آدی چکیلن مئدیالارلا یاریشماقدالار. آنجاق یئنه ده اینگلیس و آمریکا مئدییاسی کیمین ممالیک محروسه ده ائتگین دئییل لر. فرانسه مئدییاسینین یایغینلیغی عرب دونیاسی و آفریقادا داها گؤزه چاپیچیدیر.
۲.۵- پکن مئدیاسی: – سی سی تی ویCCTV
– سی جی تی ان تی ویCGTN TV
چین-نین ممالک محروسه یه فارسجا رادیوسو اولسا بئله، اونون یایغینلیغی چوخ آزدیر. چین اینگلیس دیللی مئدییالارلا اوز وار اولماغین و حضورون دونیایا حیس ائتدیرمک ده دیر.
۲.۶-عرب مئدییاسی – الجزیره و اونون چئشیدلی داللاری -العربیه و اونون چئشیدلی داللاری … میصر، عربیستان و قطر مئدییالاری عرب دونیاسینین باشیندا گئدن مئدییلارلار. آنجاق بو مئدییلار هیچ بیر چاغدا اؤزگو مئدییا اولمامیشلار و بو گونده-ده دئییللر. عرب مئدیییاسی-یؤنتیم لریندن آسیلی اولاراق- اینگلیس، آمریکا، اوروپا و روس مئدییالارینین ال- آلتیلاری و فرعی مئدییالاری لار. بو گئرچگی، بو اؤلکه لری یؤنتن کیشیلردن آنلاماق اولار.
۲.۷- ایسراییل مئدییاسی ایسراییل مئدییاسی آمریکا و اینگلیس مئدییاسیندان باشقا آیری بیر مئدییا دئییلدیر و او مئدیالارین تاماملاییجیسیدیر.
۲.۸- تورک مئدیاسی ۲.۸.۱- تورکیه مئدیاسی
تورکیه مئدییاسی اورتا دوغو و دونیانین ان گوجلو و باغیمسیز مئدییالاریندان بیری دیر. بو مئدییا اؤز چئشیدلی تی وی و رادیولاری و … ایله اورتا دوغو، اورتا آسیا، عرب دونیاسی و ایسلام دونیاسینا ائتگی قویا بیلمگی باشارمیشدیر و باشارماقدادیر.
بو مئدییا ممالک محروسه ده یاشایان تورکلرین میللی اویانیشیندا بؤیوک و دانیلماز پایی اولوبدور. بو گون تورکیه مئدییاسی، ممالک محروسه تورکلری، اؤزللیکله آزربایجان تورکلری ایچنده ان چوخ ایزله نن مئدییادیر.
۲.۸.۲- قوزئی آزربایجان مئدیاسی
قوزئی آزربایجان مئدییاسی کئچمیش شوروی مئدییاسینین تکنیک باخیمیندان گونجل لشمه سیدیر و اوردا مئدییا صنعتی تورکیه و اوروپا اؤلکه لری کیمی گلیشمه میشدیر. قوزئی آزربایجان مئدیاسیندا ایلنجه، ایسپور و باشقا اؤلکه لرین تی وی و رادیو خبرلرینین تیکراریندان سونرا آیری بیر خبر یوخدور. بئله لیکله، بو مئدییا تورکیه مئدییاسی کیمی ممالک محروسه تورکلرینده ائتگی بوراخا بیلمه میشدیر. قوزئی آزربایجان مئدییاسی، تورکیه مئدییاسیندان ائتگی آلسا بئله، گئنللیکله روس مئدییاسینین ال-آلتیسی و فرعی مئدییاسی دیر. بئله کی اوردا یاشایانلار اؤز خبرلرین روس، فارس-سحر کانالی- مئدییاسی و یا تورکیه مئدییاسیندان آلماقدالار.
۲.۸.۳- گونئی آزربایجان مئدیاسی ۲.۸.۳.۱-ایچ مئدییا تام اؤز آنلامیندا گونئی آزربایجانین و سؤزده ایران ایچینده یاشایان تورکلرین هئچ بیر چاغدا اؤز دیللرینده باغیمسیز مئدییالاری اولمامیشدیر.
اللی- یئددی اینقیلابیندان سونرا فارس اینگلیس رژیمینین میللتلری اریتمک ماشینی و سیستئمی کیمی یارانان اوستانی شبکه لر تورکلری ممالک محروسه ده اریدیب یوخ ائتمک ایچینایشیق اوزو گؤرن اؤنملی گوجلو آراجلار اولموشلار.
کئچمیشده فارس اینگلیس رئژیمی کیتاب، مدرسه و … تورک اوشاقلارینین بئیینلرین اؤزل ساعاتلاردا ایشغال ائت سه ایدی، بو کئز، بو آراجلارلا-مئدییا- فارس اینگلیس رژیمی تورکلرین ان ساغلام و قورونان یئرلری-ائولرینی- و اورادا یاشایانلارین هامیسین اریدیب یوخ ائدیجی ماشینینین دیشلرینه آلا بیلیب و سالا بیلیبدیر.
آنا یاسایا گؤره بو آراج و اونون قانلی راسیست دیشلرینین یؤنتیمی و ایشلمه یؤنته می اؤلکه نین اؤندری-خمینی و خامنه ای-نین الینده دیر. بئله لیکله اینگلیس طرفیندن ممالک محروسه تورکلرین اریدیب یوخ ائتمک ماموریتین، ریضا میرپنج و محمدریضا پهلوی-نین آریاچیلیغیندان سونرا، خمینی و خامنه ای-نین فارس شیعه چیلیگینه تاپشیریلمیشدیر.
سؤزده ایران آدلانان یئرده بوتون زوراکیلیقلارا باخمایاراق، میللی چالیشانلارین چابالاری ایله چئشیدلی سایتلار و درگیلر ایشیق اوزو گؤره بیلمیشدیر
بو اوزره وارلیق درگیسی اؤز درین، آغیر و زنگین یازیلاری ایله سؤزده ایران آدلانان یئرین قارانلیقدا بیر گونش کیمین پارلامیشدیر و پارلاماقدادیر.
۲.۸.۳.۲-دیش مئدییا بیرینجی گؤزه و بئینه گلن و ممالک محروسه دن (سؤزده ایران) ائشیکده اولان گونئی آزربایجانلا ایلکیلی تی وی قوشقوسوز گوناز تی وی دیر. بو تی وی ۲۰۰۵-جی ایلدن ایشه باشلامیش و ممالک محروسه -ده یاشایان اؤزللیکله گونئی آزربایجان تورکلرین سیاسی و کولتورل اویانیشیندا بؤیوک پای آلمیشدیر.
چئشیدلی سایتلارلا بیرلیکده، کئچمیش ایللرده، ممالک محروسه دن ائشیکده اولان تشکیلاتلار و شخصلر، اینترنئت و فئیس بوک اوزریندن-ده یایین یایماغا باشلامیشلار. بیر اؤرنک اولاراق، هارای مئدیاسی-هارای رادیوسو، هارای جانلی فئیس بوک و یوتوب- گونئی آزربایجانا هارایلانماقدادیر.
گئنل اولاراق باخدیقدا، گونئی آزربایجانین دیش مئدییاسی، میللی ی حرکتین چئشیدلی قاتلارینا بوتون باخا بیلمه ییب و گئدن اولایلاری باشقا سؤزله اولوب- بیتنلری اولدوغو کیمی یوخ، بلکه اؤز سئودیکلری و سئچدیکلری کیمی آنلاتماغا چالیشیب و گئدیشات اولدوغو کیمین گؤستریلمه میشدیر.
۲.۸.۴- اورتا آسیا مئدیاسی
اورتا آسیا مئدیاسی، روس مئدییاسینین آرخا باخچاسی، گنل اولاراق روسلارین فرعی مئدیالاریلار. آنجاق باتی مئدییاسی اؤز ائتگیسین اوروپادان یاییلان یاییملارلا، گئچمیش گونلردن داها ائتگیلی چارپیجی بیچیمده گؤسترمکده دیر و اونو گؤز آردی ائتمک اولماز. اورتا آسیادا بیر آیری ائتگین مئدییا، تورک مئدییاسیدیر.
۲.۸.۵- مئدییا اوچونجو دونیا اؤلکه لرینده
اوچونجو دونیا اؤلکه لری و تک-الچیلیک -استیبدادی- اولان اؤلکه لرده ، اؤزل و اؤزگور مئدیانین آنلامی یوخدور. اؤزل و اؤزگور مئدیانین اولماماغینین ان بؤیوک ندنی، توپلومو بیر واحید یئردن یؤنتمک و چوخ سسلی اولماغین قاباغین آلماقلا اونلاری واحیدلشدیرمک دیر. اؤرنک اولاراق آریایی و یا فارس شیعه سی ائتمک دیر.
بو گؤرو یوخاری مرکزلردن شاه ، عرب ملیکلری، ولایت فقیه و یا مادام العمر جومهور باشقانلاری الی ایله اورتا دوغو، قافقاز و اورتا آسیا دا یئریمکده اولماقدادیر.
۲.۹- ممالک محروسه ( ایران) مئدییاسی
۲.۹.۱-ممالک محروسه-ده مئدییا تاریخی
انگلیس کودئتاسیندان سونرا، دونیانین و مئدیانین گلیشمه سی ایله بیرلیکده، اینگیلیسلر ممالک محروسه مئدیاسینین چئشیدلی بویلارین- تی وی، رادیو، گونده لیکلر و … بوتونلوکله الینه کئچیردیب و فارس آزینلیغینا تاپشیردی (ممالک محروسه ده رادیو ۱۳۱۹ و تی وی ۱۳۴۶-دا قورولوبدور و ۱۳۵۸-جی ایلدن تاج یئرینه عمامه بو قورومو ایشلتمه گه باشلامیشدیر) و مئدیا یالنیز بیر کیشی و یا بیر قورومون الینه کئچدی- شاه یا ولایت فقیه.
اینگلیس کودئتاسیندان سونرا، بو اؤنملی مئدییالار، بیر واسیطه ایله- شاه و ولایت فقیه- اوست قورولا- سینیردان ائشیکده کی مرکزه- باغلیلار و مئدیا یؤنه تیمی بو آراجلارلا سینیرلار اؤته سینده کی اوست قورول- لندن، واشینقتون و … الی ایله یؤنه تیلمه ده لر.
اؤزه ت اولاراق، پهلوی گئدیب سؤزده ایسلام جومهوریسی گلسه بئله، بو ایکی دؤنمین بللی یئرلردن یؤنه تیلمه سینه گؤره، ممالک محروسه مئدیاسی یالنیز بیر الدن بیر باشقا اله کئچمیش -تاجدان عمامه یه- و سیستئمین گؤوده سی ده ییشیلمه میشدیر.
بو نا گؤره ممالک محروسه مئدییاسی هئچ زامان باغیمسیزلیغین قورویا بیلمه میشدیر و اینگلیس، آمریکا، اروپا و روس مئدییالارینین ال- آلتیلاری کیمی اونلارین سیاستلری و قازانجلاری دوغرولتوسوندا فرعی مئدییا بیچیمینده گونوموزه گلمیشدیر.
۲.۹.۲- ممالک محروسه ( ایران) مئدیاسینین مرکزی:
ممالک محروسه طئهران مرکزلیگی ایله مئدیانین گؤرولدویو یئر اولسا بئله، اونون باش قرارگاهی و یا باشقا سؤزله اوست قورولو هر زامان اولدوغو کیمین، بو گونده- ده سینیرلارین ائشیگینده اولموشدور.
بو دوروم ممالک محروسه مئدییاسین ایکینجی و یا فرعی دورما سالمیشدیر. بئله کی بیرینجی و اصلی مئدییا لندن-ده یئرلشن بی بی سی فارسجا دیر. واشینقتون، اوروپا و روس مئدیلاری بی بی سی-دن سونرا گلن اوست قوروللار و یا مرکزلردیلر.
ممالک محروسه ده کی مئدییانین فرعی اولماغین دوزگون آنلاماق ایچین، اوردا یاشایان میللت لرین بو مئدییایا اینانماماقلارین و سینیر دیشی مئدییالارا آلیشیق اولدوقلارین بیر قانیت کیمی اورتایا آتماق اولار.
اؤرنک اولاراق، مئدییالاردان خبر آختارماغین یایغینلیغی حتی ساده یوردداشیدا اؤز ایچینه آلمیشدیر، بئله کی ممالک محروسه نین آنا مئدییاسینی-بی بی سی-نی تانیمایان کیمسه یوخدور.
آنجاق سینیر دیشیندان خبر آلماق یالنیز توپلوما و ساده یوردداشادا سینیرلانمیر. ممالک محروسه ده یاشایانلار، اونلارا سیریتلانمیش شاه و ولایت فقیه-ده خبر قایناغینین دوغرو یئرین- بیرلرینین اوزلرینه گتیرمه سه لر بئله- دوغروجاسینا بیلمکده لر.
بئله کی ممالک محروسه ده نه اولاجاغا گؤره طئهراندان یاییلان مئدییالارا یوخ، بلکه خبرلر اوسته آدی گئدن مئدییا مرکزلریندن آختاریلیر.
ائشیکده کی اوست قورول بو گئرچگی بیلرک،اؤز ساوین(مئساژین) آنا مئدییا- بی بی سی و …- آراجیلیغی ایله حاکیمییت و کوتله یه وئره بیلمه گی باشارمیشدیر و باشاریر.
ممالک محروسه ده یاشایانلارین خبر قایناغی، محمد ریضا پهلوینین بی بی سی-یه قولاق آسماسی و بو گون جمهوری ولایت فقیه باشی و اونون یانداشلاری- شاه گئدن قاتاردا اولوب و سینیر دیشی مئدیایا قولاق وئرمکلری و او بویوراقلارین ایزینده و دوغرولتوسوندا یئریمکلری، اوست قورولون و باش قوماندانلیغین هاردا اولدوغونو آچیقجاسینا گؤزلر اؤنونه سرگیله مکده دیر.
۲.۹.۳- ممالک محروسه ده اولان سیاسی گؤروشلر و مئدییا
بو آرادا، ممالک محروسه ده اولوشان چئشیدلی سیاسی قانادلار، سیاسی گؤروشلرینه گؤره اؤز اربابلارینین آنا مئدییاسینی ایزله مکده لر.
اؤرنک اولاراق، موسکودان یاییلان مئدییا و یا سول گؤروشلو سیاسی قانادلاری سیمگه له ین باشقا یایین آراجلاری، ممالک محروسه نین ایچریسینده کی سول کسیمی، آغزینا آلماقدادیر. اروپا و آمریکادان یاییلان یاییملاردا اؤز قولچاقلارین کؤکلمکده لر.
۲.۹.۴- ممالک محروسه ده ( ایران) اولان میللتلر و مئدییا ممالک محروسه ده یاشایان بوتون میللتلرین بیر بؤلومو ده سینیرلاردان ائشیکده یاشاماقدادیر.فارسلار افغانیستان، تورکمنلر، تورکمنیستان و …. بو میللتلرین کیملیک، دیل و کولتورلری فارس آزینلیغی الی ایله آپاریلان مئدییادا تمثیل اولونمور. دوروم بو اولدقدا، بو میللتلر کیملیکلریندن آسیلی اولاراق سینیر دیشی مئدییالاری ایزله مکدلر.
۲.۹.۵- ممالک محروسه ده اؤزل مئدیا
پهلوی و ولایت فقیه چاغلاریندا هئچ زامان اؤزل مئدیا(تام اؤزونون دوغرو آنلامیندا) -رادیو، تی ویو … – اولمامیشدیر و اولمایاجاقدیر. مئدیا چئشیدی یالنیز اوست قورومون -سینیردان دیشاری مرکزین- گؤستریسی ایله آلت قورومون-تاج یا ولایت فقیه- یانداشلارینا- شاهچی لار و ولایت فقیه چیلره – پایلاشیلمیشدیر.
ممالکی محروسه ده گؤرونن، سؤزده موخالیفت مئدیاسی،-ساغ و سول و …- قاییقچیلار ساواشی و یا زرگری ساواش اساسیندا پایلاشیلمیش و سؤزده حاکیمیت و موخالیفت!!! ساواشی گئرچکدن اوزاق، ساختا و کونترول اولان ساواشین اؤته سیندن باشقا بیر ساواش دئییل.
سؤزون اؤزو و دوزو بو کی، حاکیمیت و موخالیفت اوست قورولا یاخشی نؤکرچیلیک ساواشی وئرمک موجادیلسینده بیر-بیرلری ایله دارتیشمادا و یاریشمادالار. بو گون بو موجادیلنی اینگلیسچی، آمریکاچی و روسچو بیچیمینده حاکیمییت و موخالیفتده آچیقجاسینا گؤرمک اولار.
۲.۹.۶- ممالک محروسه و ولایت فقیه مئدییاسی
ممالک محروسه -نین آنا یاساسینین ۱۷۵-اینجی اصلینه گؤره، رادیو و تیلویزییونون باشچیسین اؤندر-خمینی و یا خامنه ایی- تعیین ائدر. آنجاق جومهور باشقانلیغیندان، قوه قضاییه-دن و مجلیسدن طرفیندن-هره سیندن ایکی کیشی- بیر شورا اولاراق رادیو و تیلویزیوندا گئدن ایشلره نیظارت ائدرلر.
کئچمیش قیرخ ایله باخدیقدا، بو شورانین ائتگیسینین آز اولماسی و یا هئچ اولماماسی گؤزلر اؤنونده دیر.
باشقا سؤزله، بو اصل مئدیا و اونون سینیرسیز گوجون کیمین الینده اولماغی آچیقجاسینا گؤزلر اؤنونه سرمک ده دیر. بو اصل دن یارارلاناراق، بوتون چاغلاردا اؤندر-خمینی و خامنه ای- ایلک و سون سؤزو دییه ن اولموشلار.
تیلویزییون و رادیو اؤندر گوجو آلتیندا اولدوغوندان چیخاراق، تورکلره اولونان و اولان هر تورلو توهین و تحقیرلر خامنه ای-نین موستقیم نیظارتی آلتیندا اولموشدور، دئمک و اینانماق اولار.
ولایت فقیه مئدییاینین اوست قورولو لندن و آلت قوروللاری طهران و باشقا شهرلرده اؤز گؤرولرین یوروتمکده لر.
۲.۹.۶- ممالک محروسه دن ( ایران) یاییلان یاییملار
۲.۹.۶.۱- اؤلکه نین هامیسینی بوروین کاناللار، طئهران مرکزی یاییم کانالاری
– ممالک محروسه ایچینده فارس آزینلیغینین ان گوجلو و یؤیوک یالان ماشینی طئهراندان یاییملانان یاییملاردیر. بو یاییملار فارسجادیر و خبر، ایسپور و … قاپساماقدادیر.
۲.۹.۶.۲- اوستانی کاناللار، دوغو آزربایجان، …
بو یاییملارین یوزده یئتمیش بئشی فارسجادیر. قالان ییرمی بئش فایزیدا فارس دیل و کولتورونون ائتگیسی آلتیندادیر. اللی یئددی اینقیلابیندان سونرا یارانان اوستانی کاناللار ممالک محروسه ده یاشایان میللتلره، اؤزللیکله تورکلره ان بؤیوک مادی و معنوی زیانلار وورا بیلمیشدیر.
بئله کی بو کاناللارین پولو میللتین سوفره سیندن اوغورلانیب و اونلارین کیملیک، مادی و معنوی وارلیغلارینین اریدیب یوخ اولماسینا ایشله مک ده دیر.
۲.۹.۶.۳- دیشارییا یایین یاپان کاناللار، العالم، پرس تی وی و …
سینیر دیشینا یاییلان یاییملار چوخ دیلده اولسا بئله، تمل اوچ دیل -تورکجه، عربجه و اینگلیسجه- اؤنم داشیماقدادیر. بونلارین چوخ اؤنم داشییانلاری بونلاردیر:
۲.۹.۶.۳.۱- تورکجه یاییلان کانالار
آزربایجان تورکلرین ایلگیلندیرن آزربایجان تورکجه سینده یاییلان سحر کانالیدیر. بو کانال قوزئی آزربایجانی آماجلاماقدادیر. بو کانالین بیرینجی آماجی فارس شیعه چیلیگین یایماق و اونونلا باغلی قوزئی آزربایجاندا ایسلامی تروریست شبکه لری قورماق دیر. سحر کانالی ایله باغلی، ماراغی چکن قونو، قوزئی آزربایجان دؤلتینین بو کانالدان یاییلان تخریباتلارا اولدغوجا سس قووزاماماسی و قارشی آتاغا کئچمه مه سی دیر.
بئله کی بو کانالدا آچیقجاسینا، قوزئی آزربایجان دؤلتی طاغوت آدلانیر و قوزئی آزربایجان سؤزده یوردداشلاری اؤزگورجه بو کانالا تیلفون ائدیب اؤز اؤلکه لرینین و دؤلتلرینین قارشیسینا دانیشا بیلیرلر.
قوزئی آزربایجان دؤلتینین فارس مئدییاسینین تخریباتینا گؤز یومماسی و اوردا اسلامی تروریست شبکه لرین قورولماسی، قوزئی آزربایجاندا یئنی پارالل گوجلر یاراتماغی و آزربایجان تورک دؤلتچیلیگینی ضعیف دوروما-قیسسا و اوزون سورده- سالماغی اورتایا چیخاردا بیلر.
دئمگی کرکلیدیر کی، فارس شیعه چیلیک تخریباتی چالیشمالاری روس لارین یاردیم، یاتاقلیق و گؤستریشی ایله قوزئی آزربایجاندا یورومکده دیر.
اوزولرک، قوزئی آزربایجان دؤلتینین سیاستی فارس حاکیمیتینین یانداشلارینا گؤره -اسلامی تئروریستلره گؤره-بو گونه دک یالنیز دووشانا قاچ، تازییا توت دییه سیاستی شوبهه سینی اویاندیرا بیلمه گی باشارا بیلمیشدیر.
بیر حالدا کی قوزئی آزربایجان دؤلتی ممالیک محروسه ده یاشایان قیرخ میلیوندان آرتیق تورکون معنوی گوجوندن یارارلانیب و چوخلو ایشلر گؤره بیلر، بیر حالدا کی گؤنئی آزربایجاندا یاشایان گنجلره قوزئی آزربایجاندا تحصیل و …ایمکانلار یارادا بیلر و بیر حالدا کی گؤنئی آزربایجاندا گئدن میللی ساواشین خبرلرین یایماقلا، دولایی یولارلا بو مدنی و دئموکراتیک حرکتی دستکله یه بیلر، بیر حالدا کی اورمو گؤلونون فاجیعه سین اؤز مئدییا گوجو و ایمکانلاری ایله دونیایا چاتدیرا بیلر، بو ایشلرین هله ده هئچ بیریسینین یئترینجه اولماماسی درین قایغیلار و شوبهه لر یاراتماقدادیر.
قوزئی آزربایجان باغیمسیز گؤرونسه بئله-اوزولرک-اؤلکه مذهبی باخیمدان فارس شیعه چیلیگین ائتگیسی آلتیندادیر. بئله کی هر ایل یوزلرجه آزربایجان گنجلیگی اینگیلس فارس شیعه چیلیک مطبغینده بئیینلری طلبه لیک آدی آلتیندا پیشیریلیب، جاسوسا دؤنوب و تورک میللتینین و آزربایجان دؤلتچیلیگینین قارشیسیندا سیرا چکمکده لر. هر گون قوزئی آزربایجان یورتداشلارینین اؤلوم فتواسی فارس شیعه چیلیگینین مرکزی قوم شهریندن گلمک ده دیر. قوزئی آزربایجان یازاری رافیق تقی -نین تئرور ائدیلمه سی بیر اؤرنک دیر.
۲.۹.۶.۳.۲- عرب کاناللاری یاییلان عرب کاناللارینین ساییسی چوخ اولسا بئله، العالم شبکه سی اینگلیس فارس حاکیمییتینین ایسلام و عرب دونیاسیندا آیریمجیلیق و تئرور شبکه لری قورماقدا ان بؤیوک پایی واردیر. بو گون بو کانالین و بو کیمی کاناللارین ائتگیسینین سونوجون مذهبی ساواشلار بیچیمینده سوریه، لبنان و یمن ده گؤرمک ده ییک.
۲.۹.۶.۳.۳- اینگلیسجه کانال پرس تی وی اینگلیس فارس حاکیمییتینین آماجلارینی اینگلیسجه دونیا اوزرینه یایماقدادیر. بو کانالدا ماراقلی اولان بؤلوم فارس شیعچیلیگی ایله بیرگه هخامنش و ساسانی لیکده تبلیغ اولونور و اولماقدادیر. بئله کی بو کانادا ممالک محروسه نین آدی پرشیا گئدیر و ممالک محروسه دن دوزه لینن و گؤتورولن فیلم لر، اورانی فارس گؤسترمکده دیر.
۳- توپلوم ایله حاکمییتی یؤنته تن مئدییا
آنا مرکزدن گؤروله نن مئدییانین بیرینجی گؤروی، هر توپلومون دوشونجه لرین مهندیسلیک ائدیب و یؤنتمکدیر. آنجاق بو مهندیسلیک و یؤنتمک توپلوما سینیرلانمیر. بئله کی، اربابلار آنا مرکز مئدییا سی ایله اؤز یاراتدیغی حاکیمیتلریده- قولچاقلاری دا-مهندیسی ائدر یؤنت لر.
۳.۱- توپلوم یؤنتیمی:
آنا مئدیا و ممالک محروسه ده اولان فرعی مئدییالارین گؤروی، توپلومو ممالک محروسه-ده قورولان قولچاق حاکیمییته باغلی اولماغی، صادیق قالماغی و اونو قورماغی ساغلار و یؤنه تر.
۳.۲- حاکیمییتین یؤنه تیمی:
بیرینجی باخیشدا، گیزلی یؤنتم، یوللار و گیزلی آژانلرین اولدوغوندا، اربابلار اؤز یاراتدیغی قولچاق حاکیمییتلری مئدییا آراجلاری ایله آچیقجاسینا یؤنتمگی گرکلی گؤرمزلر، گؤرونه بیلر. آنجاق تاریخی تجربه لره و بو گونکو مئدییالاردا گئدن اولایلارا باخدیقدا بو سؤزون ترسینی ده گؤرمک ده ییک.
اؤرنک اولاراق، زامانلا قولچاق حاکیمییتلر رقیب اربابلارین ائتگیسینین آلتینا کئچیر و بیرینجی اربابی ائشیتمه گه قولاغی اولمور، و یا قولچاق حاکیمییت او قدر جانللانیب و شیشیر کی سانیر دوغرودان -دوغروسو شاهلار شاهی و یا دونیا موسلمانلارینین اؤندری اولموش-بیرین کنده قویموردولار، کتخودایام دئییردی – و اونو گتیرن اربابی دانماغا باشلاییر.
بو زامان گیزلی آژانلارلا بیرلیکده، مئدییا ایله یؤن وئرمک و یا ادب ائتمک اورتایا گیریر. گونوموزده شیلتاقلیق ائدن ایسلامی حاکیمییتی ادب ائتمکده و اونو یؤنتمکده، بی بی سی، رادیو فردا و پیک نت سایتینین بؤیوک و دانیلماز روللاری واردیر.
سونوج:
گؤروندویو کیمین بو گونکو دونیامیزدا, مئدییا گوجو ان بؤیوک گوجلرین بیریدیر.آنجاق بو گوج یالنیز بؤیوک گوجلرین و دونیانی یؤنتنلرین و اونلارین قولچاقلارینین الینده دیر.
دونیانین بو گونکو مئدییا دوزنی و هارالارا یایین یاپماقلاری و کیملرین آرخاسیندا اولماقلاری و کیمین خبرین یایماقلاری، اونلارین کیمدن یانا اولدوقلارینی آچیقجاسینا گؤسترمکده دیر.
اگر بی بی سی و یا هانسی مئدییا ممالک محروسه ده یاشایان تورکلرین خبرلرین وئرمیر و یا اگر بیریسی اؤزونه ایسلام دونیاسینین اؤندری دئییب و تورکون مادی و معنوی وارلیغینی یوخ ائدیر، بونلارین بیزه ساولاری (مئساژلاری) وار.
بیز بو گون بیلمه لیییک کی، بی بی سی و اونو کیمی مئدییالارین دئدیگی بشر حقوقو بیر بؤیوک یالان و آراجدیر، آماج دئییل.
بیز بو گون بیلمه لیییک کی، بیر ولایت فقیه کی دونیا موسلمانلارینین اؤندرلیگینه ایدعاسی وار و قیرخ میلیون تورکون دیلین یاساق ائدیبدیر و ائرمنی یه آرخا دوروبدور، موسلمان دئییل. تورکو یوخ ائتمک ایچین موسلمانلیق اونا آراجدیر، آماج دئییل.
اونوتمایاق کی، ممالک محروسه ده اولان مئدییالار و یاییلان یاییملار، سینیر دیشی مرکزین گوجو آلتیندادیر. و ولایت فقیه یالنیز بیر ایجرا ائدن آلت دیر.
اونوتمایاق کی مئدیالار ساواشیندا چیرپینر آزربایجان،
اونوتمایاق کی، بو گون گونئی آزربایجانا بیر خبری تلویزیون سودان-دا، چؤرکدن-ده گرکلی دیر.
سونوج بؤلومونو تورکیه یازاری بانو آوار-ین سؤزلری ایله بیتیریرم.
بانو آوار یازیر:
“باخین، آمریکادا و اوروپادا یوزلرجه تی وی کانالی وار. کوچوک بیر آراشدیرما هامیسینین بیر نئچه عایله یه اولماغینی قانیتلار. یئنی دونیانی آماجلایانلار، مئدییانین هر تورلوسو اللرینده دیر. ایسته نیلن بیلگیلر ایسته نیلن اؤلچوده میللته کئدر. گونون بؤیوک بؤلومونده، یوخاریدان اونون ایچین سئچیلن بئیین اویوشدورما وئرلیشلرله اویالانیب، یاتاغینا گئدر. بیر یانیندا قورخو، آجلیق، ایشسیزلیک نوبت توتار. بیر یانیندا رنگلی کاغیذلار، بالونلار، اوینایان آییلار و چیپلاق قیزلار واردیر. یوخاریداکی لار دینله ن سینلر (ایستیراحت ائله سینلر). آشاغیداکیلار درین یوخودالار.”
سون
