ایران محورلی سیاسی جریانلارین هامیسی آزربایجان و آزربایجان دا گئدن میلی حرکتی گؤرمز دن گلمک ده دیرلر. بئله لیک له گلجک ده آزربایجان فاکتورونو خنثی ائدیب و گلجک سیستئم ده میلی حقوق لاری تاپدالاییب، یئنه فارس محور بیر سیستئم قورماق نیّتینده اولدوقلاری آنلاشیلماقدادیر.

ایرانچی سیاست چوخداندیر، آزربایجان یولونو اونلاردان آییراراق اؤز میلی_سیاسی حرکتینی و خطینی یاراتدیغینین فرقینده دیر. بونون اوچونده اینکار و بایکوت یؤنته مینی ایجرا ائتمک ده دیر لر.

اونلارجا آزربایجان دا میلی حرکتی و آزربایجان محور میلی_سیاسی جریانی رسمیته تانیسالار اوندا بو گون ده، گلجکده ده بو حرکت و خطه امتیاز وئرمه یه مجبور قالاجاقلار.

بونون اوچونده آزربایجان دا گئدن میلی_سیاسی فعالیت لری گؤرمزدن گله رک، گلجک اؤز ظن لری جه قورولاجاق فارس /ایران محورلی سیاستی اولدو_بیتدیییه گتیرمک استراتژیسینی ایزله ییرلر.

اونلار آزربایجانی گورمزدن گله رک، آزربایجانین طالعینی و گلجه یینی ده ایران مرکزلی بیر قورولوشونون ایچینده محو ائتمک ایسته ییرلر.

داها دوغروسو آزربایجان داکی میلی_سیاسی حرکتی گؤرمزدن گلدیکلری بو جریان و حرکتدن قورخدوقلاری اوچوندور. بو ایسه میلی حرکتین گوجونون و یایغینلیغی نین گؤسترگه سی دیر. باشقا سؤزله فارس شوونیزمی آزربایجان میلی حرکتینین گوجو و تأثیر دایره سینین بؤیوکلویونون فرقیده دیر.

تورک میلتیمیز ده بو مسئله یه متوجه اولوب و اومید گؤزو ایله شونیزم محورلی جریانلارا یوخ، آزربایجان دا کی میلی حرکته باخیرسا اوندا، همیشه لیک اولاراق اؤز دوغرو یولونو تاپیب و “میلی سعادته” چاتا بیلر.

بئله گؤرونور کی میلی فعاللار و تورک میلتی ده آرتیق فارس شوونیزمینه باغلی جریان و حرکتلری بیلینجلی و پروقراملی اولاراق بایکوت ائدیب و همیشه لیک اولاراق اونلاردان آیریلیب و تام موستقیل حرکت آپارماغا باشلامالی دیر لار. عکسی حالدا او جریانلار آزربایجان اوچون فلاکت و استعماردان باشقا هئچ نه وئرمیه جکلر.

آزربایجانین قورتولوشو و آزاد یاشاماسی یالنیز و یالنیز میلی قوّه ایله مومکوندور. بو گون آزربایجانی گوج موضعینده اولمایان لار گؤرمزدن گلیرلرسه، صاباح گوج موضعینده اولدوقدا محو ائده جکلر.

بونون قارشیسیندا یالنیز تک بیر قوّه واردیر اودا آزربایجان محورلی میلی_سیاسی قوّه یعنی آزربایجان میلی حرکتی.

قایناق: آیدینلیق کانالی