آزربايجان تانیتیم اوجاغینین تورکو شعر و ادبیات قورولتایی وئرلیشی آزربایجان گئییم‌لری گئیینن اوغلان قیزلارین طرفیندن قارشیلانان اؤیرنجی‌لر بیربیر شهید شفایی تالارینا گیریردیرلر. تالاردا اوجاغین قوردوغو آزربایجان تورکجه‌سینده شعر و ادبیات ییغینجاغی و یاریشماسی آپاریلیردیر.
ایکی هفته قاباقدان آزربایجان تانیتیم اوجاغی دانیشگاهین اؤیرنجی‌لریندن دعوت ائتمیشدیر کی اؤز یازدیقلاری تورکجه شعرلرینی گؤندریب ان یاخشی شعرلر یاریشمادا اوخونسونلار و اونلارین آراسیندان اوچ اوستون شعره اؤدول وئریلسین.
شعرلرین آراسیندا قضاوت ائلمک اوچون عزیز و دیرلی اوستادلار سایین دوکتور بهروز بیگ بابایی، علامه طباطبایی بیلیم یوردونون اوستادی، و سایین دوکتور اسماعیل مددی، شاعیر و اورمیه بیلیم یوردونون اوستادی، بو ییغینجاغا قاتیلمیشدیرلار.
باشلانیش دان سونرا ایلک اؤنجه کانونون دبیری، محمد‌رضا عبداللهی بی،
همایشین آماجی و ندن قورولدوغویلا ایلگی‌لی قونوشدولار.
***
آپاریجی، فاطمه خانیم انتظاری، چاغیریشی ایلا دکتر بهروز بابایی صحنه‌یه گلیب و دانیشیقلاریندا ادبیاتین اؤنملی اولدوغونا هابئله دونیا ادبیات آراسیندا تورک ادبیاتین قورومونا توخوندولار. وئریلیشین آردیندا عزیز شاعیریمیز، سایین دوکتور مددی جنابلاری، صحنه‌یه چیخیب اؤیرنجی‌لرین کؤنولویله بیرگه دانیشماغا دئییل ساده‌جه شعر اوخوماغا قرار وئردیلر. اوخودوقلاری دؤرد شعر آراسیندا اورمیه شهرینه یازیلان دویغولو بیر شعر دیقت‌لری لاپ‌چوخ چکدی.
داها سونرا آپاریجی دئدیگی ایله ۵۰یه یاخین شعرین آراسیندان سئچیلن ۸ شعرین صاحیب‌لری سئرایلا صحنه‌یه چیخیب اؤز شعرلرینی ایفا ائتدیلر.
ییغینجاق داها گؤزل اولوب سیخیجی اولماسین دئیه آرادا شایان بی انتظاری ایله سالار بی خدایی‌نین ایکی قوپوز ایفاسینا شاهید اولدوق. ایکینجی ایفادا اؤیرنجی‌لر ایفاچی‌یا سس وئریب اونونلا بیرلیکده ” یئل توخوندو یاپراقلارا ” ماهنی‌سینی اوخودولار.
سوندا بو سکگیز شعرین ایچینده محتوا و قورولوشو همیده نئجه ایفا اولدوغونا باخاراق حؤرمتلی داورلر بو عزیز گنج شاعیرلرین شعرلرین اؤدوله لاییق بیلدیلر:
۱-رفقا شعری سعید ذکی بی دن
۲-خاطیره لر فیرتیناسی دنیز صمدپور خانیم دان
۳-آراز شعری پیمان دادرس بی دن
***
آزربایجان تانیتیم اوجاغی اومور کی گله‌جکده بئله ییغینجاق‌لارین قورولماسیلا دیلیمیز و ادبیاتیمیزا لاییق اولان یئرینه قوووشسون و دانیشیقلاریمیزا یاددان چیخان شعرلر گئری‌دن قاییدسین.
قایناق: آزربایجان تانیتیم اوجاغی
@ato_tabrizu
