خارجده یاشایان آشیری فارس اوپوزیسیونلاری، حتی داخیلده و اوستو اؤرتولو چالیشان بو اوپوزیسیونلار ۱۳۸۸- جی ایل میر حسین موسوی باشچیلیغی ایله و ۱۳۹۶- جی ایل دی آییندا
روح اله زم تلگرام کانالی مدیری توسطی‌ایله تنظبم ائدیلن اعتراضلارا آزربایجانلیلارین ( تورکلرین) قاتیلماماسیندان ناراضی اولاراق هر کس بو مسئلهیه اؤز فیکیر باجاسیندان باخیر و اونو تفسیر ائدیر!
بعضیلری: «داها تورکلر، اؤزللیکله بو منطقهنین ان بؤیوک و سیاسی شهری اولان تبریز اهالیسی سیاستدن اوزاقلاشیبلار…!»،
بعضیلری ایسه: « ۱۳۸۵ جی ایل و «سوسک- بؤجک» جریانی اعتراضیندا تورکلر سرکوب اولاندان سونرا داها قورخوبلار و اعتراض و تظاهراتلارا قوشولمورلار…!»
بو و بونا اوخشار تفسیرلرله قارشی قارشییا قالدیق و قالیریق، آمما بو باصطلاح سیاسی مفسّرلر اساسی بیر مسئله‌نی باشا دوشمور و یا باشا دوشمک ایسته‌میر و موضوعونو اوستو اؤرتولو ساخلاماغی مصلحت گؤرورلر!
ایراندا یاشایان و ان آزی ایران جمعیتی‌نین %۴۰ تشکیل ائدن تورکلر ایللردیر داها اؤز آنا دیل،مدنیت،هویّت، دوزگون تاریخ و وارلیقلارینا صاحیب چیخیبلار و ایراندا اولان جمعیّتلری‌نین نسبتی قَدَر،باشقا سؤزله، فارسلار قدری ابتدایی‌دن توتدو دانیشگاهین سونونا قدر آنا دیللری اولان تورک دیلینده تحصیل آلماق و باشقا مادی – معنوی حقلره مالیک اولمانی طبیعی و انسانی حقلری بیلیرلر و بو حقلره چاتماغا مدنی مبارزه‌لرینه داوام ائدیب و ائده جکلر!
۱۳۸۸- جی و ۱۳۹۶- جی ایل اعتراضیندا تورکلرین و باشقا غیر فارس میلیّتلرین پهلوی دؤنمیندن ایندیه قدر تاپدالانمیش هانسی مادی- معنوی حقلریندن مدافعه ائدیلدی کی، تورکلر حتی شعار حدّینده اولان بو جریانا اینانیب یولا سالینان بو اعتراضلارا قوشولسونلار؟!
1۱۳۹۶- جی ایل اعتراضلارین رهبر و اؤندری کیم ایدی و اونون بئینینده هانسی انسانی حقلره اینام واریدی کی، ایللر بؤیو ان ابتدایی حق اولان یعنی آنا دیلده تحصیلدن محروم قالان تورکلری اؤز طرفینه چکسین؟!
۱۳۹۶- جی ایل دی آیی اعتراضیندا « ایران که شاه نداره، حساب کتاب نداره» ، « ما آریایی هستیم عرب نمی پرستیم »، « رضا شاه روحت شاد»! شعارلاری وئرنلرین رهبرلری انتظارلاری واریدی تورکلر بو اعتراضلارا قوشولسونلارمی؟ تورکلر داها باشقا بیر شاه و دیکتاتورون حاکمیت باشینا گلمه‌سینه یوخ، اؤز انسانی حقلرینه چاتماغا چالیشیرلار و چالیشاجاقلار!
سیز هله حاکمیّت اوستونه گلمه‌دن و تورکلرین یاردیمینا احتیاجینیز اولدوغو حالدا بو حقلری قبول ائتمکدن و دیلینیزه گتیرمکدن چکینیرسینیز، حاکمیّت اوستونه گلسه‌نیز هانسی حقلری ایراندا بو %۴۰ تورکلره تانییاجاقسینیز؟!
اگر خارجده یاشایان فارس اوپوزیسیونلارینا و ایران ایچینده چالیشان پان ایرانیستلره یالنیز رژیمین دگیشمه‌سی و کراوتلی دیکتاتورلارین ایش باشینا گلمه‌سی اؤنملی ایسه بیز تورکلره ایران ایچینده فارسلار قدری آنا دیلده تحصیلدن توتدو بوتون مادی- معنوی حاقلاریمیزا چاتماق و آلین یازیمیزی اؤز الیمیزله یازماق،کؤله و برده کیمی یوخ، انسان کیمی یاشاماق اؤنملیدیر!
تورکلر بو اؤلکه‌ده سیاسی- اقتصادی و باشقا ساحه‌لرده اؤنملی رولا مالیکدیرلر، هر هانسی دؤلت و حاکمیّت تورکلرین طبیعی و انسانی ایستکلرینی رسمیتله تانییرسا، طبیعی کی، اونلارین اکثریت مثبت نظرینی قازاناجاقدیر!
