«دام-داما دیر دامیمیز
قوشادی آمالیمیز
سن اوردان گل بیز بوردان
ییخیلسن دوشمانیمیز»
***
اورمودا هارای چکیلنده اوره ییم آجیییر
زنگانی، خویو… چاغیریر ساییر
اردبیلین کسگین دیوشچولریندن الهام آلیر
تبریز آدی گلنده شرف بایراغیمیز گؤیده دالغالانیر
***
نه گؤزل دیر آزربایجان دورور – دیرچه لیر
یاغی دوشمان دهشتیندن اینجه لیر
نه گؤزل دیر خلقیمیز اؤزونو دوشونور
باخین تورپاغا دوشموش بیر ملت یئنیدن یوکسه لیر
***
بورادا بیزیم یورودوموزدا
درد وار، دوستاق وار
آجی وار، آغری وار
بوردا شاللاق واز
تحقیر ده وار، سورگون ده وار
آنجاق یورغونلوق یوخدور
***
بورادا ایگیدلر چیگنینده
ظفر بایراغی دالغالانیر
بیری ییخلسا
بیری دوستاغا دوشسه
بیری سورگونه گؤندریلسه
واردی گئنه مین دلی قانلی ایگیدلر
واردی سوکوتو هارایا چئویره نلر
واردی یوروشوندا یئره لرزه سالان کوتله لر
واردی شرفله دؤیوشکن خلقیمیز
***
بورادا دؤیوشن قیزلارین آرخاسیندا دورور آنالار
بورادا آتا-اوغول، دوستاغا بیرگه گئدیرلر!
بورادا «داردا قالان» ایگیدلر
تفاوتسوز، مروتسیز انسانلارا باغیریر
بورادا اسیر ملتیمیز اؤزگورلوگو چاغیریر
***
بورادا آجی-شیرین حادثه لر یاشانیر
بورادا ملت شاللاق لا تمکینه چاغریلیر
بورادا کوتله وی بیر دؤیوش حماسه سی دالغالانیر!
***
بورادا دؤیوش بایراغی یئره دوشمز
بورادا بیرملتین اراده سی
یوم یوموشاق سو کیمی آخیر
یئری گلدیکده ایلدیرم کیمی شاخیر
بورادا بیر ملت دییشیکلیک یاراتماغا چالیشیر
