هله گئچمیشلری دئمیرم، گئچن بیر ایل یاریمدا عباس بی لسانی بیر چوخ چتینلیکلره، مصیبتلره دؤزوب، اونلاری باشدان سووماغا مجبور اولموشدور:

-تقریباً بیر ایل یاریم دیر ناحق یئره یاخالانیب، حبس سالینیبدیر و ۱۵ ایل حبس چکمه یه و سورگونه محکوم ائدیلمیشدیر.

-بو بیر ایل یاریمدا لسانی عاییله سینی مالی و معیشت باخیمیندان سیخینتییا سالماق اوچون گئج اوغلونون ایش یئرینی پولومب ائدیب باغلامیشدیلار.

-محترم حبات یولداشی رقیه خانیمین آتاسی رحمته گئتدی، اجازه وئرمه دیلر یامان گونده، گلیب مصیبتلی یولداشینا تسکین اولسون…

-آلتی آیدی کورونا ویروسو اؤلکه نی گؤتوروب، اردبیل شهرینین دورومو آیلاردیر قیرمیزی دیر. بو آرادا بیر چوخ زیندانیلره مرخصلیک وئردیلر. هم خسته لنمه دن آماندا قالسینلار، هم عاییله لرینه دایاق اولسونلار. حتی اوغرویا، ایرییه، قاچاقچییا مرخصلیک وئردیلر؛ آنجاق عباس بی یه مرخصلیک وئرمه دیلر… قویمادیلار بو بلالی گونلرده اؤز عاییله سی نین یانیندا اولسون….

-نئچه گون دور بؤیوک قارداشی نین وای خبری هر یانا یاییلیبدیر ؛ ائشیدن ، بیلن اوزاقدان -یاخیندان تسلیت دئییر، باش ساغلیغی وئریر… آنجاق عباس بی زینداندا یالقیز باشینا قالیبدیر و بوتون بو مصیبتلره تک باشینا دؤزمه لیدیر.

یار- یولداشی یانیندا دئییل قولتوغونا گیره، بیری یوخ دور قارداش اؤلومونون خبری گلنده یانیندا دوروب سنه تسلّی وئره…
هامی مجبوروق اوزاقدان – اوزاغا سنه تسلیت دئییب باش ساغلیغی وئرک
سنه و عزیز قارداشیوین باشقا قالانلارینا آیدین گله جک آرزو ائده ک….

بیلیرم قارداش اؤلومو آجی دیر، آغیردیر…
مشهور دور دئییرلر قارداش اؤلومو، قارداشین بئلینی ایه ر!
آنجاق سن اییلمه قارداش ! اخی سن صبیر داغیسان!
داغ کی، اییلمز…

***

یقین ائدیرم عباس بی بو تضییقلر قارشیسیندا سارسیلمایاجاق، اؤز حقلی مبارزه سینه داوام ائتدیره جک.
وطن اوغروندا، ملت اوغروندا مبارزه داوام ائدیر و عباس بی بو مبارزه نین اؤن سیراسیندا ایره لی گئدیر!