آنا دیلیمیز، بیزیم واز کئچیلمز ایسته‌ییمیز محمد رحمانی فر
آچیقلاما:
ایرانین آنا یاساسینین قوشقولو اللرله یازیلماسی و اوردا، بشر حقوقونو گؤز آردی ائدیب، تاجیک ( فارس) دیلینین ایراندا یاشایان میللتلره دایاتیلماسی دانیلماز بیر گئرچکدیر.
ایرانین ازیچی چوخونلوغو هر زامان تاریخ بویو تورکلر اولموشدور. تاریخی تحریف ائدیب و گئرچکلری اؤرت-باسدیر ائتمکله تاجیک دیلینی رسمی دوروما میندیرمک و تورکلری و تورک دیلینی ۱۵-جی ماده ایله آزینلیق دورومونا سالماق کئچمیش یوز ایللیگین باشدا گئدن توطئه لرینین بیریسی اولموشدور.
بیر حالدا کی ایرانین آنا یاساسینین ۱۹-جو ماده سی بوتون ایراندا یاشایانلارا ائشیت (برابر) حاقلار تانیییر و هر تورلو رنگ، کیملیک و دیل اوستونلوک ساییلمیر، بو ماده نین ایچریگی ۱۵-جی ماده-ده عمدی اولاراق گؤز آردی ائدیلمیشدیر و تاجیک دیلینی باشقا دیللره اوستون سایاراق، او دیل رسمیت کورسوسونه میندیریلمیشدیر.
۱۵-جی ماده نین ان بؤیوک سونوجلاریندان بیریسی، بو ماده-یه دایاناراق تورکلر و تورک دیلینین آزینلیق دوروما دوشمه سی دیر.
بو گون هر بیر تورک بشر حقوقونا دایاناراق، ۱۹-جو ماده یه دایاناراق، تام ائشیت (مساوی) حاقلارینی ایسته مه لیدیر. ۱۵-جی ماده-نی ایسته مگین، آزینلیق دوروما دوشمه گی اونایلاماغین، آشاغیدان یوخارییا باخماغین زامانی چوخدان بیتمیشدیر.
بو گون آرتیق ۱۵-جی ماده نین نه قدر بشر حقوقلارینا قارشی اولماسی و ایرانین آنا یاساسیندا ۱۹-جو ماده-نی نقض ائتمسی گؤرلر اونونده دیر. دوروم بئله ایسه، هر تورکون ایسته گی تورک دیلینین رسمی اولماغینین گرکلی اولماغیدیر.
هارای
—————–
آنا دیلیمیز، بیزیم واز کئچیلمز ایسته‌ییمیز / محمد رحمانی فر
دیلسیزلیک آجیمیز یوز ایلینی دولدورماقدادیر. پهلوی رژیمی دئوریلدیکده، ایراندا یاشایان فارس اولمایان میللت‌لر آراسیندا بیر اومود دوغدو. یئنی آنا یاسانین ۱۵.جی اصلی، 
یئترسیزلییینه باخمایاراق، بوتون دیل‌لرین قورونماسینی آز-چوخ تضمین ائدیردی. آنجاق، بو اصلین اونایلانماسیندان ۴۲ ایل کئچسه ده، بوگونه‌دک اجرا اولونا بیلمه‌ییب‌دیر.
آزربایجان تورک میللتی، بو ۴۲ ایلده، هر زامان بو اصلین اجرا اولونماسی حاققینداکی ایستک‌لرینی دیله گتیریب‌دیر. بیر چوخ آزربایجان تورکو یالنیز و یالنیز بو یئترسیز اصلین اجرا اولونماسینی ایسته‌دییینه گؤره، چئشیدلی سیاسی-امنیتی سوچلامالارا اوغراییب، دوستاق یاخود سورگون ائدیلمیشدیر. دئمک، حوکومت آنا دیلی سورونوندا، بیر آددیم بئله، گئری چکیلمک ایسته‌مه‌میش و اؤزونون اونایلادیغی یاسالارین اجراسینی بئله گئرچکلشدیرمه‌میش‌دیر.
بو دورومو گؤرن بیر سیرا آزربایجانچی یولداش‌لار، حوکومت‌دن بوتون اومودلاریمیزی کسمه‌لی اولدوغوموزون گرکلی اولدوغونو دیله گتیرمکده‌دیرلر. گؤرونوشده بئله گؤرونسه ده، اونوتمایاق کی بیز بو حوکومت‌دن هئچ بیر شئی اومماساق دا بئله، اؤز ایستک‌لریمیزی هر زامان اورتایا قویمالیییق!
آنا دیلیمیز قونوسونداکی حاق‌لاریمیزین گئرچکلشمه‌سی حوکومتین بوینونون بورجودور. یئترسیز اولسا دا بئله، ۱۵.جی هابئله ۱۹.جو اصل‌لر بو بورجو حوکومتین بوینونا قویماقدادیر. بیزیم اؤز ایستک‌لریمیزدن واز کئچمه‌ییمیز حوکومتین بوینوندان بو آغیر یوکو گؤتورمک آنلامینا گلر. بو دا حوکومتین تام ایسته‌دییی بیر دورومدور.
گؤروندویو کیمی، بو سؤزلر حوکومته بئل باغلاماق آنلامینا گلمز! بیز آنا دیلیمیزی یاشاتماق اوغروندا بوتون اولاناق‌لاریمیزدان یارارلانمالیییق. آنا دیلیمیزی اؤیرنمه‌لی و اؤیرتمه‌لیییک؛ آنا دیلیمیزده یازیب اوخومالیییق؛ آنا دیلمیزده یازیلمیش اولان بیتیک‌لری آلیب اوخویوب پایلاشمالیییق!
اؤزل‌لیک‌له ده یئنی‌یئتمه‌لریمیزی هابئله گنجلریمیزی بو دیلده یازیب اوخوماغا یؤنلندیرمه‌لیییک. آنجاق، بوتون بونلارا باخمایاراق، آنا دیلیمیزین حاققینداکی ایستک‌لریمیزی ده هر زامان دیله گتیرمه‌لیییک. بئله‌لیک‌له، حوکومت هر زامان بو آغیر یوکو اؤز چییینینده، بو اؤده‌مه‌دییی بورجو اؤز بوینوندا، بیزیم آغیر باسقی‌لاریمیزی ایسه اؤز اوزه‌رینده حیس ائتمه‌لی‌دیر. سونوجدا ایسه، آنا دیلیمیزین بیزیم واز کئچیلمز ایستک‌لریمیزین لاپ باشدا گلن‌لرینین بیری اولدوغونو هر زامان بیلمه‌لی‌دیر.
