خبر:

ایراندا  نگهبان شوراسی طرفیندن جمهور باشقانلیغی آدایلیغینا اونای وئریلمیشلرین بیری محسن مهر علیزاده -دیر.  بیر حالدا کی ایراندا یاشایان ائتنیکلرین ملی حاقلاریندان دانیشان آدایلار

چئشیدلی ندنلره گؤره نگهبان شوراسی طرفیندن  اونایلانمامیشلار، مهر علیزاده بیر قوروپ آزربایجانلیلارا ۱۵-جی اصلین دقیق اجرا اولماسینا گؤره سؤز وئردی.

———————————–

چؤرک و دیل. ۱۵-جی اصلی ایسته ین ده ده-نیز چوخدان اؤلموشدور / اؤزگور هارای

ماللا ایله اوغلو

بیر گون بیر ماللا اوغلوندان سوروشدو: منیم اوغولوم گلجکده عایله قوروپ و گئچینمک ایچین، نه ایش گؤرمک ایسته ییرسین؟
ماللانین اوغلو بیر آز دوشوندوکدن سونرا دئدی: آتا من اؤز یاشاییشیمی سورمک ایچین، سیزین کیمین بیر ماللا اولماق ایسته ییرم.
ماللا دؤزمه دن باشماغینی چیخاریب و اوغلونون تپه سینه چالاراق باغیردی: من آللاه دان پیغمبرلیک ایسته دیم، ماللا اولا بیلدیم. سن ماللالیق ایسته سن، هئچ نه اولا بیلمه سن.

***

گیجلمک داییره سی

بیز ایللردیر ماللا اولماق ایسته ییریک، بیز هله ده اؤزوموزو و میللتیمیزی بیر داییره یه سالیب، اؤز باشیمیزا فیرلانیریق. آنجاق خبریمیز یوخدور، بلکه ده واردیر!!! دونیا چوخ ده ییشمیشدیر! بو گونکو دونیا دیجیتال دونیاسیدیر، ایلتیشیم دونیاسیدیر. دونیا بیر ال تیلفونو ایله بیر شخصین الینه یئرلشمیشدیر. میللنیمیز بیزدن چوع آرا آچمیش و اؤنه دوشموشدور. میللتیمیز بیز اولدوغوموز داییره دن چوخدان چیخمیشدیر. داییره ده اؤز باشینا کئفلی-کئفلی سومسونن و گیجلله نن بیزیک.  او بیز کی …

***

نه ایسته دیگیمیز بللی دئییل!

بو گون ۱۵-جی اصلدن دانیشماق، دئمک هله ده ایراندا اولان ائتنیک مسئله سینین دوغرو ماهیتینی، نه ایسته دیگیمیزی، بو گون و گلجکده نه اولاجاغیمیزی، تاجیک دیلینین (فارسجا) بسندگی پروژه سینین آماجلارینی (تاجیک دیلینین قیسسا-اوزون سوره لی دایاتما پروژه سی)، قارشیمیزدا دوران-ایج و دیش- گوجلرینین قیسسا و اوزون سوره لی اریتمک پیلانلارینی و ان اؤنملیسی بؤلگه میزده و دونیادا گئدن اولایلارین و آخیملارین هانسی آخاقلاردا آخماقلارینی، و بو قارقاشادا بیز تورکلرین هاردا اولماغینی و بو گوندن گلجه یه آخان گونلرده بؤیوک گوجلرین اوزوموزه گلن ۱۰۰ ایلین و حتی ۱۰۰ ایللیکلرین پروژه سینین تملینی آتماق چابالارینی یئترینجه گؤرمکده و آنلاماقدا زورلوق چکمگیمیزی گؤسترمکده دیر. نه ایسته دیگیمیز اؤزوموزه و میللتیمیزه آیدین اولماماقدادیر.

***

۱۵-جی اصل دن دانشماق! یوخسا تورکجه میزین رسمی اولماسی؟؟؟

۱۵-جی اصلدن دانیشماغین چاغی چوخدان بیتمیشدیر.
۱۵- اصل تورکلری کیچیتمک، آشاغیلاماق و اونو آزینلیق دوروما سالماق اصلیدیر. ۱۵-جی اصل، ان دوغرو عیرقچیلیق سیاستینین گؤسترگه سیدیر. ۱۵-جی اصل، ۱۹-جو اصلی، باشقا سؤزله، بیرگه و برابرلیگی نقض ائدن، بیریلرینی اوستون و بیریلرینی آشاغی سالان اصلدیر. ۱۵-جی اصل راسیستیک اصلیدیر. ۱۵-جی اصل شیعه شعوبینین، شیعه عاریایینی اصلی اولا بیلر. آنجاق اینسانلیق اصلی اولا بیلمز. ۱۵-جی اصل دوغرولوق و دوزلوک اصلی اولا بیلمز.

۱۵-جی اصل فیریلداقچیلیق اصلیدیر. او فیریلداچیلیق که قیرخ ایکی ایلدیر دوامی واردیر. او فیریلداقچیلیق کی بو گون اونون ففیریلداقچیلاری ذلیل-ذلیل  بیز تیکه یال ایچین، مئیدانلاردا قویروق بولاماقدالار.

تورک بیر کیچیک آزینلقیق دئییل کی، اونا ۱۵-جی اصل سیریتلانسین. تورک ایرانین هر بیر شئییدیر، کئچمیشیدیر، بو گونودور، گله جگیدیر. بو گون و هر زامان هر تورکون ایستگی، تورک دیلینین ایراندا رسمی اولماسیدیر و تامام.  ۱۵-جی اصلی ایسته ین ده ده-نیز چوخدان اؤلموشدور آرتیق.

***

اؤلوم اؤلومدور سه، بو آرادا خیریلداماق نه دئمکدیر؟

ایللردیر اوز-گؤزلرینه موسلمان اؤرتوگو سارانلاردان و یا سؤزده دئموکراسی توتگین چالانلاردان ۱۵-جی اصلی ایسته مکده ییک؟!! سونوج نه اولموشدور؟ هانسی اوغورو بیزه گتیرمیشدیر؟ قازاندیرمیشدیر؟ هانسی تهمتلردن و ایتهاملاردان بیزی ساوونموشدور؟ پان تاجیکلر(پان فارسلار)، پان شیعه شعوبی لر، پان ایرانیستلر، ایسلام و ایران داغیلماسین دییه اؤرتویو آلتیندا ووردوقلاری تهمتلر و ایتهاملار آزالمیشمی؟ یوخسا چوخالمیش می؟ اؤلکه نین آنا یاساسینین اجراسینی ایسته ینلر دوستاقلاردا دئییللر می؟ ۱۵-جی اصلی و آنا دیلده اوخوماق حاققینی ایسته ینلر دوستاقدا دئییلر می؟، عجبا، اؤلوم، اؤلومدور سه، بو آرادا خیریلداماق نه دئمکدیر؟ ۱۵-جی اصلی ایستمک نه دئمک دیر؟  ندن ائشیت لیک (برابرلیک) ایسته مه یه لیم؟؟؟!!!! ندن دیلیمیزین رسمی اولماسینی ایسته مه یه لیم؟؟؟!!!

***

۱۵-جی اصل و عیرقیچیلارین سیاستلرینین تملی

بو گون تورک میللتینین دوشمانلاری، پان تاجیکلرین (پان فارسلارین) میللی جبهه سیندن توتوب، طباطباییلرینه  دک ۱۵-جی اصلی تمل توتاراق، مدرسه لرده ایکی واحید تورکجه نین اوخونولماسینا قارشی دئییللر.

اونلارین باخیشیندان، هر زامان اولدوغو کیمی، زامانین اویغون اولماغی گرکلیدیر. او اویغون زامان کی هئچ زامان اویغون اولمایاجاقدیر و او دئدیکلری زامان کی، هئچ زامان گلمه یه جکدیر. بئله لیکله عیرقیچیلارین ۱۵-جی اصل ایله ایلگیلی سیاستلری زامانی اوزالتماق و سوروندورمک و بیزدن چوخ غنیمت قوپارماق سیاستی دیر.

***

چؤرک و دیل. ندن تورکجه میز رسمی اولمالیدیر؟

تورک دوشمانلارینین سیاستلری ۱۵-جی اصلی وئرمه دن اؤنجه زامانی اوزالتماق و بیزدن چوخ غنیمت قوپارماق سا، دئدیکلری ۱۵-جی اصلی، توتالیم، وئرندن سونرا بیز تورکلری اوزون سوره لی اریتمک سیاستینه اویغونلاشدیرماغی دوشونمکدلر.

بئله کی تورکجه میزی اوشاقلار باخچاسی، مدرسه، بیلی یورد (اونیوئرسیته)، آلیش-وئریش، ایش-آش و سیاست دیلی ائدیلمه مه سینه گؤره، بیز تورکلری قیسسا و  اوزون سوره ده (تاجیک دیلینین بسندگی پروژه لری و… کیمی پروژه لرله )  اریمک و یوخ ائتمگی پیلانلاشدیرماقدالار.

دوروم بو ایسه، پیلان بو ایسه، کی بودور و گؤرونن کنده بلدچی ایستمز دییه، بیز اؤز دیلیمیزی چؤرگه، دئمک، ایش ایله آشا باغلامالییق. باشقا سؤزله، دیلیمیزین رسمی اولماسینی ایسته مه لییک. ایرانین آنا یاساسینی تمل توتاراق، ۱۹-جو اصله دایاناراق، کیمسیه نین، کیمسه دن اوستون اولمادیغینا گؤره، برابر و ائشیت اودوغونا گؤره، تورک دیلینین رسمی اولماسینی ایستمکله، بو دیلی اوشاقلار باخچاسینا، مدرسه یه، بیلی یوردا(اونیوئرسیته یه)، ایشه-آشا، آلیش-وئریشه و سیاسته باغلاماغلا، دیلیمیزی و اؤزوموزو یوخ اولوب، اریمکدن قورتارا بیلریک.

***

سونوج

قارشیمیزدا اولان گوجون و یا گوجلرین قیسسا و اوزون سوره لی اریتمک پروژه لرینده اریممک ایچین، یوخ اولماماق ایچین، گرک تورک دیلی ایراندا رسمی اولسون.