- In آزربایجان, خبرلر
- جولای 29, 2022
«زاب» سو، یوخسا «اورانیوم» تونئلی؟حبیب ساسانیان
زاب تونئلی، اصلینده اورمو گؤلونو جانلاندیرماق اوچون یوخ، گؤلو محو ائتمک اوچوندور.
ایلک باخیشدا بو سؤز بؤیوک بیر ادعا نظرینیزه گلسه ده، یازیقلار اولسون کی، چوخ آجی بیر گئرچک‌دیر. چونکو او تونئلین قازینتی ایشلری ایرانین رسمی خبر آژانس‌لاری ایله گونئی آزربایجانین مجلیسده کی نماینده لرینه دایاناراق، چوخدان دیر کی بیتیب و حتی استفاده یه ده وئریلیب. آمما سو چاتدیرما یوخ، اورانیوم آییرما اوزره!!!
بیرچوخلارینیزین بیلدیگی کیمی، سون گونلرده اورمو گؤلونون گرگین دورومو اوزاندیقجا فاجیعه‌وی بیر چئوره چاتیشمازلیغینا چئوریلمه‌سی، گونئی آزربایجانین طالعی ایله اویناماق دئمکدیر.
گئرچک هابئله سانال اورتامدا 20 گوندن آرتیقدیر کی، بو ساحه ده هرطرفلی تنقیدلر، رئاکسیالار(قارشی‌دورمالار)، توئیتر فیرتیناسی، مقاله‌لر، ائله‌جه ده اینیستا گرام واسیطه‌سی ایله جانلی یایینلار داوام ائدیر.
بوتون بونلارین باشیندا، یالنیز و یالنیز، اورمو گؤلونون دیرچلدیریلمه‌سی دورور.
بیرینجی مسئله ایسه، زاب چایینین سویونو اورمو گؤلونه اؤتوره جک «کانی‌سیب» و یا همن «زاب» تونئلینین یوباندیرلماسی دیر. اینترنئت چاغیندا معده گوجونه هرهانسی غرضلی و مرضلی ادعالاری ایره‌لی سورمک، مدعاچی‌نین آخماقلیغیندان باشقا هئچ بیر شئیین گؤستریجی‌سی اولا بیلمز.
محض بو سبب‌دن گلین فاکتلارا دایاناراق، ألیمیزده اولان داشلاریمیزی (پازل‌لری) سیرا ایله یان-یانا دوزک و مسئله یه آچیقلاما گتیرک.
۱- ۸ اردیبهشت ۱۳۹۲، ۱۴:۴۱
کد خبر: 80633693
جمهوری اسلامی خبر آژانسی: « مركز انرژي اتمي بناب به عنوان مجتمع پژوهشي كاربرد پرتوهاي شمالغرب فعاليت خواهد كرد.» لینک خبر
۲- بیلدیر یعنی ۱۴۰۰-جو ایلین آبان آیینین ۳۰-دا غربی آذربایجان استانداری، تسنیم خبر آژانسینا مصاحبه سینده، تونئلین قازینتی ایشلرینین بیتمه‌سینی رسمی صورت ده آچیقلادی.
۳- کُردپرس سایتی بو ایل خردادین ۲۲-ده، زاب تونئلینین آغیر خرجینه باخمایاراق، وعده وعیدلر آراسیندا ایتیب باتدیغیندان گیلئی‌لندی. لینک https://is.gd/MLGETW
۴- مهر خبر آژانسی بو ایل یعنی 1401 خردادین ۲۱-ده ساعات ۱۴:۰۴ ثانیه ده یازدی: « گؤله سو چاتدیراجاق تونئلین آچیلیشی، بهمن آیی‌نا قالدی» لینک https://tinyurl.com/2cdcnxke
۵- تبریز، توفارقان (آذرشهر) و اوسکو شهرلرینین مجلس نماینده‌سی مسعود پزشکیان، اؤتن آخشام میللی – مردمی آکتیویستلرین همتی ایله اینیستاگرامداکی آردیجیل جانلی یاییمدان مجبور اولدو کی آچیقجاسینا :« تونئلین قازینتی ایشلرینین تامامیله بیتدیگینی، آنجاق نه‌دن اونون آچیلیشینی یوباندیریلماسینی اؤزو ده بیلمه دیگینی» اعتراف ائتدی!
قید:
همن لایو دا، آپاریجی جناب پزشکیان‌دان مدافعه اوچون، ۲۶ –جی دقیقه ده دئدی کی:« بوندان آچیق نئجه دئمک اولار کی، آقای پزشکیان بویورور؛ بیر عده لر تونئلین آچیلماسیندا رئیس جمهورون دا سؤزونه باخمیرلار!»
ایندی گلین گؤرک بو بیر عده‌لر کیملردیر و هاردان گوج آلیرلار؟
۶- ۱۴۰۰-جو ایلین دی آیینین ۵-ده یئنه ده تسنیم خبر آژانسی، گؤلون محدوده سیندن مجوزسیز و اؤزباشینالیقلا دوز ایله باشقا معدنی املاح‌لارین گؤتورولدویوندن گیلئی‌لندی.
لینک:
دیققت: اورمو گؤلونون دیرچلیش قورومو(ستاد احیاء دریاچه‌ی اورمیه)نین قرارینا گؤره، مجوزلری اولانلار، ایلین اؤزل آیلاریندا یالنیز قدیمکی ساحیلی خط دن 200 متر ایره لی و تکجه 20 سانتیمتر درینلیکده دوز گؤتوره بیلرلر. بو بیر حالدادیرکی، آدی هئچ بیر یئرده چکیلمه‌ین سپاه پاسدارانا عایید «الغدیر شرکتی» ایسته‌دیکلری آن‌دا گؤلون أن درین یئرلریندن، ایسته‌دیکلری قدر قازیب و سؤزده دوز، عمل ده لیتیوم لا اورانیوم‌لاری تام احتیاطسیزلیقلا بیلینمز یئرلره داشییرلار!!! هله اونونلا یاناشی شورابلی سویون اوستو آچیق کامیونلاردا داشینماسی اطراف محیطی و مسیرده کی آسفالتی خاراب ائدیر و أن اساسی سویون دا آزالماسینا سبب اولور، یاندا دورسون؛ دئمه‌لی، ایندی سؤزون باشی آچیلیر.
گلین سون لینکین خبرینی ده اوخویاق، سونرا مسئله نین اینجه لیکلرینه دؤنوب و سونوج آلاق.
دیرناق آراسینداکی لینکه اساسن، بیرگه ایقلیم شرایطینده اولان وان گؤلونون تکینده،7.5 میلیارد دُلار دَیَرینده 50 تُن اورانیوم واردیر. بو ایسه اورمو گؤلونده ده عین ماده لرین اولدوغوندان خبر وئریر.(تهلوکه سیزلیک دن دولایی، بو ایشله مشغول اولان تانیشین وئردیگی بیلگی نی سیزینله شخصین آدینی چکمه‌دن پایلاشدیم.)
بیر نئچه سورغو یارانیر:
-
درینلیک دن گؤتورولن دوزلارین سببی و نه دن محیط زیست فعاللارینین قیشقیریق باغیرمالارینا اؤنم وئرمیرلر؟ بو شبهه یه آچیقلاما گتیریلمهلی دیر. طبیعی دیر کی مربوطه ارگانلارا بو مسئله نی یئرلی – دیبلی دانماقدا قالین – قاییم تاپشیریق وئریلیب، دوز دئییرلر سه، خارجی لابراتووارلاردا درینلیکدن بیر آنالیز نمونه سی آراشدیریلسین.
-
پزشکیان دان اؤنجه کی لایو دا، باشقا بیر وکیل‌الدوله(متفکر آزاد) آچیقجاسینا پزشکیانین ترسینه :« من اؤزوم گئتدیم تونولو گؤردوم و تونئلین ایچینده قورخونجلو چارتداقلارین اولدوغو و اونون ترمیمی آچیلیشین یوباندیریلماسینا سبب اولدوغونو» وورغولادی! (مسئوللارین دیلیندن بو کیمی ضدیتلی ایفاده لر گؤستَریر کی، نه سه بیر سیرری گیزلتمک ایسته ییرلر).
-
اوسته گل، بو ایل تیر آیینین 22-ده ایسنا خبر آژانسی ساری داش ایله خانا ( سردشت و پیرانشهر) وکیلی ، کمال حسین پوردان مجلسین آچیق اجلاسیندا یازدی:« اورمو گؤلونون برپاسی قرارگاهینین پلانلارینین ثمرسیزلیین‌دن امین اولدوغوموز حالدا، نه اوچون هله ده یانلیش یولدا آددیملاییریق؟!»
-
کوردلرین بؤیوک کوردوستان رؤیاسی ادعالارینا باخمایاراق، نه دن بو مسئله ده سوسوبلار و اوسته لیک گؤلون دیرچه لیشینه قارشی چیخیرلار؟
-
بو کورددیل‌لی نماینده ادعا ائدیب کی، «گؤله سو اؤتورمه تونئلینین تیکینتی‌سین‌دن سونرا پیرانشهرده یئرآلتی سولارین سَوییه‌سی آشاغی دوشوب، بولاقلار و قویولار قورویوب. بیر نئچه اون ایللیکلر عرضینده اکینچی‌لیک‌له مشغول اولان خانالی لار بو گون بیر چوخ چاتیشمازلیقلا اوزلَشیب‌لَر. خانا (پیرانشهرلی‌لَر)نیه بونالیما ( بحرانا) دوشمه‌لی‌دیر؟»
-
بو یالان ایفاده‌لر اورمو گؤلونه سو اؤتوروجو تونئلین تیکینتی‌سینین ایندی ده بیتمه‌دیگینی و زاب چایین‌دان بیر دامجی بئله سویون گؤتورولمه‌دیگی بیر واخت‌دادیر.
-
کمال حسین پور ایران حکومتی و پارلامئنتین‌دن «بو مسئله‌یه اولدوقجا تئز داخیل اولمالارینی» ایسته‌ییب. او، دئییب: «اورمو گؤلونون دیرچلدیلمه‌سی فوندامئنتال (بنیادی)مسئله‌دیر، آنجاق بیزیم خانادان (پیرانشهردن) گؤله سو گؤتورمه‌‌مه‌ییمیز و اکین‌چی‌لیک ساحه‌لرینین محوینه سبب اولماغیمیز قبول ائدیلمزدیر».
-
مسئله بوراسین‌دادیر کی، زاب چایینین مجراسی سوندا ساری‌داش (سردشت) داغیندا دگیل، عراقین شیمالین‌دا بیتیر و بو ائکسترئمیست (افراطچی) نماینده زابین سویونو اورمو گؤلونه کئچیرمکله عراق کورد بؤلگه‌سینه داها آز سویون چاتاجاغیندان ناراحات‌دیر.. اصلینده بئله دگیل، اونون مجلسده بار-بار باغیرماسی حاکمیتین یاشیل چیراغیندان ایره‌لی گلیر. آچیغینی دئسک، بو کیمی مخالفت‌لر، تردد یاراداراق، زاب تونئلینین سو مجراسی کیمی استفاده‌سینه دور دئییر و نتیجه ده، زاب‌دان اصلینده گیزلین هدفله قازیلدیغی یؤنده، یعنی گؤلدن گؤتورولن دوزلو اورانیوم ماده‌سینین سس‌سیزجه‌سینه آیرینتیلاری اوزره سوءاستفاده اولونور. اوسته‌لیک زاب تونئلی، آنجاق و آنجاق اورموئ گؤلونه سو چاتدیرماق نامینه ایشله‌نیب و اساساًَ قرار دگیل، اکینچیلیکلر اوندان بارینسین لار.
-
بوندان اؤنجه سویوق بولاق (مهاباد) نماینده‌سی «جلال محمودزاده» دفعه‌لرله اورمو گؤلونه سدلردن سویون بوراخیلماسینا اعتراض ائدیب!..
-
دکتر مسعود پژشکیانین یوخاریدا اشاره ائتدیگیم جانلی یاییندا بیر نئچه ایفاده سینه دیققت یئتیرمکله سؤزلریمی بیتیریب قضاوتی بؤیوک آزربایجان میللتینه، قانع ائدیجی جاوابلاری ایسه گؤرَولی شخص‌لره تاپشیریرام.
-
جناب پزشکیان مغرورجاسینا میللتی آچیق –آیدین هده‌له‌یه رک دئییردیلر:« اعتراض ائدنلرین باشینی دا رفسنجانی کیمی گؤلده بوغوب اؤلدوررلر!
-
هابئله؛ او دئییردی کی، قارشی دورمادان سا، گلین بورا قدر وظیفه‌لرینی یئرینه یئتیرمه ین مسئوللارا دستک اولاق! یعنی بیر باشا میللتیمیزین کؤکونو کسن آند ایچمیش مسئوللارا اؤزوموز آرخا دوراق کی، تئزلیکله داها گوجلو و آرخایینجاسینا نسلیمیزی کسسینلر؟
-
و سوندا: گئرچک‌دن زاب تونئلینده سودان باشقا، هر هانسی گیزلین ایشلر گؤرولمور سه، یوباندیریب شوبهه‌لی آثاری تمیزله مه دن، یئرلی و خاریجی مئدیالارا ایزین وئرسینلر کی، گونو سحردن، تونئلین باشدان باشاسیندان گؤرونتولو چکیلیش ائده‌رک توپلومون اینامینی قازانسینلار. عکس حالدا بیزیم ادعالاری، داها دا تصدیقله مک دئمکدیر.
حبیب ساسانیان (یاکاموز ) ژورنالیست مستقل حرکت ملی آزربایجان جنوبی ۱۹ ایول ۲۰۲۲
