۱. “جاهان” درگیسی‌نین بیرینجی ساییسی ایشیق اۆزو گؤردوکدن سونرا “شلاله” وئرلیشینه دعوت اولوندوم. شلاله خانیم دره‌دن-تپه‌دن سوردو، قاراباغدان باشقا. من ده بوروق وئریب گئنیش بیر قاراباغ‌نامه اوخودوم. قاراباغ مسئله‌سی‌نین باریش یولویلا چؤزولمه‌یه‌جه‌یینی
دوقتور ایواز طاها
وورغولادیم.
سؤزومو کسمه‌دیلر، آمما ندنسه کامئرا آرخاسینداکی‌لار منه أیری باخیردیلار.
۲. وئرلیش جانلی دئییلدی، بو موصاحیبه ائرته‌سی گۆن ائفیره بوراخیلاجاقدی.
یازارلار اوتاغیندا اوتوروب وئرلیشه باخیردیق. قاراباغ حاققیندا دانیشدیقلاریمین هامیسی چیخاریلمیشدی. «بو نه اویون‌دور»، دئیه گیلئیلندیم.
۳. چاشقین باخیش‌لاری منه زیللنمیش أمکداشلارین بیری دیله گلدی: «ایواز بی! دۆز ائله‌ییبلر ده. موحاریبه‌نی قیزیشدیرماغین نه معناسی وار؟»
«تجاووزه قارشی دیرَنمک هامیمیزین بورجوموزدور» دئدیم. بو سؤز سانکی بیر بومبا کیمی اورتالیغی قاریشدیردی. أمکداشلارین بیری گرگینلیک ایچینده دئدی:
«ایواز بی سیزدن بونو گؤزله‌مزدیم. بیزیم وظیفه‌میز یازماق‌دیر، عسکرین ده وظیفه‌سی دؤیوشمک.»
۴. دوخسانینجی ایل‌لرین سونوندا دوروم بئله ایدی. بایرام‌لارداکی تبریک‌لریمده قاراباغ قاچقین‌لارینی دا آنیردیم. بو ایسه هر اون نفردن بئشی‌نین منفی تپکیسینه سبب اولوردور:
«عیشیمیزی پوز ما دا، قاچقین‌لار باکینی محو ائدیب»!
بئله بیر شاشیردیجی پسیولیک [انفعال] ، قاراباغین گئری آلیناجاغینا دایر بۆتون اومودلاری پوچا چیخاریردی. حاکیمیت ایسه اؤز اۆزرینده هئچ بیر باسقی گؤرموردو.
آمما ایندی دوروم دییشیب. کۆتله “قاراباغ- قاراباغ” دئیه تام آیاغا قالخیب.
۵. آزربایجان بؤیوک گۆج‌لرین، اؤزللیک‌له روسیانین، تحقیرلرینه آرتیق دؤزمک ایسته‌میر.
بۆتون مۆحاریبه‌لرده کۆتله ووروشمالارین دایاندیریلماسینی گؤزله‌ییر، آمما آتش‌کس گئجه‌سی آزربایجان خالقی یاتمیردی کی، مۆحاریبه بیردن دایانار.
۶. آزربایجان میللتی‌نین بو ایراده‌سی آرتیق بۆتون طرف‌لره گؤرونمزین باسقی آراجینا چئوریلیب. روسیا، ایران، مینسک گروپو داها کئچمیشده‌کی اعتیناسیزلیق‌لارینی سۆردوره بیلمه‌یه‌جک‌لر.
بوندان اؤنجه قاراباغ مسئله‌سینده کۆتله فاکتورو یوخ درجه‌سینده ایدی، ایندی ایسه تام آپاریجی عامیل‌دیر.
