آچبقلاما:

آشاغیدا گئدن یازی ده یرلی یازار بهنام کیانی-دندیر. بو یازینین باشلیغی هارای طرفیندن آتیلمیشدیر.

—————————-

کوردستان ایالتی نین اوستاندارلارینین اورمیه یه گلمسی و سینه لرینه تاخمیش بویوک کوردستان خریطه سی نه دئمک دیر ؟

بهنام کیانی اجیرلی

بو حرکت رسما باتی آزربایجا نی کوردستانا عاید اولماغینی گؤسترمک دئمکدیر .منه ائله گلیر دولت کابینه سی آچیق و آیدین آزربایجانلیلارا مئیدان اوخویور و بئله نظره گلیر ایرانشهری لر نهایت آز زمان دا آزربایجانی ایله مرکزی دؤلتی قارشی-قارشیا قویاجاقلار.

بو  دؤلت طرفیندن آتیلمیش چوخ بیر سهو آدیم دیر، و معلوم دئیل جناب وحیدی بیر دولت ناظیری اولاراق نیه بو قدر مسئله یه لاقید یاناشمیشدیر .

بو چوخ تاسف لی دیر، اونا گؤره کی، اولا، خریطه نین کورد دولت آداملاری سینه سینده گزدیرمک بیر نوع ایران دولتی نین اوزونه توهین دیر . و ایکینجی هچ اولماسا دولت ظاهیرده ده اولسا چالشیب ازربایجاندا ائتنیکسل مسئله لری اویاتماسین .

اما بو حرکت چوخ تهلکه لی دیر و منه بئله گلیر کی ایرانشهری قووه داها دؤزومونو الدن وریب و سیاستینی علنی شکیلده آپارماق قرارینا گلیب.

اصلینده بئله نظره گلیر سلیمان سویلونون پ کا کا بارده و اونون عملیات مرکزی بارده سؤیلدیگی سؤزلر و آچیقلامالار ،دولتین بو تشبوثو له اوست -وسته دوشور . و چوخ احتمال که پ کا کا آرتیخ مجبوردو عراقی ترک ائدیب باشقا یئرده اوزونه مرکز قورسون. بو قرارگاهین مرکزی زنگه زور و اونون اطرافی اولا بیلر. بونو مهدویان دا تصدیق ائدیر. البته او ایرانلی لاری آد آپاریر اما معلوم دور بو ایرانلی دیه نده کیملری نظرده توتور.

هچ شبهه سیز غربی آزربایجان و عمومیتله آزربایجان دا یئنی بیر شرایط یارانماقدا دیر و بو شرایط منه ائله گلیر آغا محمدخان قاجار دان سونرا قافقازدا یارانمیش حادثه لرین باشقا سیاسی مستوی ده یئنی سناریونون یارانماقی دئمکدیر.

تخمینا آلتی آی بوندان قاباخ دئمیشدیم ایرانشهری لر کوردستان دا اولان ثابت سیزلیگی ازربایجانین ایچینه گتیرمک ایستیرلر و فکر ائلیرم سهو ائتمه میشم. اونلار تام بو استقامته حرکت ائدیللر و اردوغان نین ینی دن پرزیدنت چیخماسی اونلاری بو ایشه ال اپارماقا قطعیت لی ائدیب.

دیگر طرفدن اونلار ارمنستاندان-دا اومیدلرینی کسیب لر. و بیلیرلر زنگه زور کوریدوری آچیلماقدا دیر .  کوردستان اقلیمی عراغین یئنی لایحه سینده و نفت-ین اوردان اوروپایا ترانزیت اولماسیندا اؤزونه بویوک بیر یئر آییریر.

اگر بو لایحه یئر توتسا، طبیعی اولاراق بوتون تئرور گروپلاری غربی آزربایجانا تؤکوله جک لر و بحرانی آزربایجانین ایچینه سوخاجاقلار.

اقلیم ین اقتصادی لایحه لری غربی آزربایجاندا حیاتا کئچمسی، بیر تله دیر و اقلیم بو منطقه ده اقتصادیات فیکرینده دئییل ،اولسادا آماج او دئییل.

بوردا چوخلو مقام لار و پیلان لار وار. البته بوراجاق بیز بو مسئله نی کوردلرین و ایرانشهری لرین باخیشیندان آنالیز ائتددیک.تورکیه و ازربایجان جومهوریتی نه ایش گوره جکلر اودا اؤزونو گوسترجک.